ڕێژەیا ٨٠% یا جاددە و كۆلانێن گوندێ خرابابكێ ل زاخۆ نەهاتینە قێركرن
ل گۆندێ خرابابكێ یێ سەر ب ئیدارەیا سەربخوە یا زاخۆ ڤە، نێزیكی سێ هزار مالان لێ هەنە، درێژاهیا جاددە و كولانێن وێ نێزیكی ٢٠ هزار كیلۆمەترانە، و هەتا نوكە ڕێژا ٨٠% یا جاددە و كولانێن وێ نە هاتینە قێركرن، لەوما خەلكێ گۆندێ خرابابكێ داخوازا دروست كرنا جاددە و كولانێن گۆندی دكەن و دابینكرنا خزمەتگۆزاریێن زێدەتر بۆ گۆندێ وان.
عەلی سامی ئێكە ژ ئاكنجیێن گۆندێ خرابابكێ بۆ ڕۆژناما ئەڤرۆ دیار كر، جاددە و كولانێن گۆندێ مە هەمی ژێهەلی و تەقنن و زارۆیێن مە گەلەك زەحمەتێ و ئاستەنگان دبینن هەتا دچنە قۆتابخانێ، ژبەر خرابیا ڕێكێ و نە قێركرنا وێ گێچێن تڕۆمبێلێن مە ڕادبن، ژبەر هندێ من سێ تڕۆمبێل گوهوڕینە.
هەڤال عسمەت، گەنجەكێ ئاكنجیێ هەمان گۆندی گۆت:”ژبلی خرابیا ڕێكێ و نە قێركرنا جاددە و كولانان، خزمەتگۆزاری ل گۆندێ مە گەلەك دكێمن، هەتا نوكە مە پارك و بنگەهێ ساخلەمیێ نینە، بۆڕیێن ئاڤێ نە ل ژێر ئەردی نە، ئاڤا هندەك كولانان ژی گەلەك كێمە، لەوما ئەم دخوازن خزمەتگۆزاریێن زێدەتر بهێنە گۆندێ مە، چونكی گۆند وەكو بەرێ نەمایە و یێ مەزن بوویی و گەهشتیە زاخۆ”.
مشیر محەمەد قایمقامێ قەزا زاخۆ گۆت:”ل دووڤ ڕاسپاردەیا گۆهدار شێخۆ سەرپەرشتێ ئیدارەیا سەربخوە یا زاخۆ تیمەكێ كارگێری و تەكنیكی ب سەرپەرشتیا هێژا محەمەد جێگرێ سەرپەرشتێ ئیدارەیا سەربخوە یا زاخۆ سەرەدانا گۆندێ خرابابكێ كرییە، بڕیار هاتیە دان كو ئێدی وەكو تاخەكێ زاخۆ سەرەدەری ل گەل ڤی گۆندی بهێتە كرن و ئەڤ بڕیارە ڕادەستی باژێرڤانیا زاخۆ هاتیە كرن و ب زووترین دەم دێ خزمەتگۆزاریێن زێدەتر ژ یا پێدڤی بۆ وەلاتیان هێنە ئەنجامدان”.
