ب هنارتنا پەترۆلێ دێ لڤین كەڤیتە د بازاری دا و هزاران دەلیڤەیێن كاری دێ پەیدا بن
ئەندامەكێ تۆرا ئابۆریناسێن ئیراقێ راگەهاند: دەستپێكرنا هنارتنا پەترۆلا هەرێما كوردستانێ دێ لڤینەكا مەزن ئێخیتە د بازارێن هەرێما كوردستانێدا و دەلیڤەیێن كاری بۆ هزاران كەسان پەیداكەت.
محەمەد حسێن، ئەندامێ تۆرا ئابۆریناسێن ئیراقێ بۆ دەنگێ ئەمریكا گۆت» هنارتنا پەترۆلا هەرێمێ ژبلی پەیداكرنا دەلیڤەیێن كاری، مەهانە دێ بیتە ئەگەرێ مەزاختنا گۆژمەیێ 150 هەتا 200 ملیۆن دۆلاران ژ داهاتێ زەڤیێن پەترۆلی و دێ لڤینێ ژی ئێخیتە د بازاراندا».
گۆت ژی» پێگەهێ هەرێما كوردستانێ ژی ل دەمێ دانوستاندنان ل گەل ئیراقێ دێ ب هێز كەت، چونكە ژ نوكە و وێڤە هەرێم دێ پشكدار بیت د بەرهەمئینانا داهاتێ نیشتمانییا ئیراقیدا، بەرۆڤاژی پێشتر كو تنێ داخوازا پارەی ژ ئیراقێ دكر».
سەبارەت هۆكارێ فشارێن ئەمریكا بۆ دەستپێكرنا هنارتنا پەترۆلا هەرێمێ بۆ دەرڤە، محەمەد حسێن دبێژیت» ئەمریكا دخوازیت ل حالەتێ هشككرنا هنارتنا دەرڤە یا پەترۆلا ئیرانێ د چارچۆڤەیێ سزایێن ئابووری، پەترۆلا هەرێما كوردستانێ بكەتە شوینگرێ وێ».
ژ ئالیێ خوەڤە شوان محەمەد، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان بۆ دەنگێ ئەمریكا گۆت» ئێك ژ رەخنەیێن دەستهەلاتدارێن ئیراقێ و پەرلەمانتارێن وێ ئەوبوو كو هەرێما كوردستانێ پەترۆلی رادەست ناكەت وداهات نینە، بەلێ مەهانە ترلیۆن دینار بۆ مووچەیان دڤێت».
گۆت ژی» هنارتنا پترۆلی بۆ دەرڤە دێ وان رەخنەیان لادەت و بەهانەیان د دەستێ ئیراقێدا ناهێلیت و دڤێت د دەمێ خوە دا مووچە و بۆدجەیا هەرێما كوردستانێ بهێتە هنارتن».
