ب ئامادەبوونا سەربەست لەزگین رێوڕەسمێ ئیمزاكرنا پرتووكا (تەتەر تەوفیق بەگ) نێروەیی برێڤەچـوو
ب ئامادەبوونا سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ و د. عەلی تەتەر، پارێزگارێ دهۆكێ و هەرسێ هاریكارێن مەكتەبێ و د. نەوزاد عەبدوللا، بەرپرسێ لقێ ئێك یێ پارتی و سازیێن حزبی و حكومی و لەشكری دوهی 25/2/2025 رێورەسمێ ئیمزاكرنا پرتووكا (تەتەر تەوفیق بەگ) نێروەیی ل هۆلا كۆنفرانسان ل باژێڕێ دهـۆكێ برێڤەچوو.
سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ د رێوڕەسمێ دا پەیڤەك پێشكێش كر و گۆت: «خوشحال بووین كو بەرهەمەكێ نوو یێ جیاوازتر كەفتە بەر دەستێ خواندەڤانێ مە، هەردەما پرتووكەك ل سەر خەبات و دیرۆكا گەلێ مە بهێتە نڤیسین، ئەز پێ كەیفخۆش دبم و سوپاسیا وان نڤیسەران دكەم، ئەوێن گرنگیێ ددەنە ڤی بیاڤی».
بەرپرسێ مەكتەبا رێكخستنا پارتی ل پارێزگەها دهۆكێ سوپاسیا (تەتەر تەوفیق بەگ) نێروەیی كر، بۆ ڤێ دەستپێشخەریا كری كو ئەڤ بەرهەمە ئێخستیە بەر دەستێ خواندەڤانان و گۆت: «ئەڤ جۆرە بەرهەمە دێ وەكو دیكومێنتەك مینیت بۆ نفشێ نهۆ و داهاتی، داكو مفای ژێ وەرگرن».
سەربەست لەزگین د درێژاهیا پەیڤا خۆ دا پەسنا خەبات و بەرخودانا مالباتا نڤیسەر (تەتەر تەوفیق بەگ) نێروەیی كر، د ناڤ بزاڤا رزگاریخوازیا كوردستانێ دا و گۆت: «دیرۆك دسەلمینیت كو ڤێ مالباتێ پتری 100 سالان خەباتا كری و د گەل هزر و بیرێن ئازادیخوازیێ و رێبازا پیرۆزا بارزانی دا بووینە خەباتەكا دوور و درێژ یا ئەنجام دایی، لەوما ئەم د پشتڕاستین كو ناڤەرۆكا ڤێ پرتووكێ دێ تایبەتمەندیا خۆ هەبیت».
