هەکە ژن خوارنێن هەمەرەنگ چێکەت دێ پتر سەرنجا زەلامی ڕاکێشیت
بێوار حەمدی:
شێفەکێ بۆ ڕۆژنامەیا ئەڤرۆ دیار کر کو گەلەک گرنگە ژن هەموو جورێن خوارنێ و شریناهیان بزانیت، کچەکێ ژی گۆت: نەک بتنێ کچ بەلکۆ پێدڤییە هەردوو رەگەز د چێکرنا خوارنێ دا پشکدار ببن، ژبەرکو سەردەم هوسا دخوازیت.
شێف شینا رێکانی گۆت: من ب هزاران جورێن خوارنان چێکرینە و هەتا یێن ڕۆژئاڤا ژی، بدیتنا من گەلەک گرنگە ژن هەموو جورێن خوارنێ و شریناهیان بزانیت، ژبەرکۆ هەموو دەمان مرۆڤ پێدڤی ب خوارنێ یە.
شینایێ گۆتژی: هەکە ژن خوارنێن جوراو جور چێکەت دێ پتر سەرنجا زەلامی ڕاکێشیت، ئەڤجا ئەڤ زەلامە چ برا بیت یان باب یان هەڤژین.
سوزان باپیر کچەکا گەنجە سەبارەت هەمان بابەت گۆت: ئەز دزانم هندەک جورێن خوارنا چێکەم و خۆ ب ڕێڤە ببەم، لێ ب هزرا من نەک بتنێ کچ، بەلکۆ پێدڤییە هەردوو رەگەز د چێکرنا خوارنێ دا پشکدار ببن، چونکی سەردەم هوسا دخوازیت و هەکە هاریکاریا ئێکودوو نەکەن دێ بارگرانی کەڤیتە سەر لایەکی بتنێ.
سوزانێ د بەردەوامیا ئاخفتنێن خودا دیار کر کو د جڤاکێ کوردەواری دا چێکرنا خوارنێ بتنێ بەهرا ژنێ یە، زەلام هاریکاریا ژنان ناکەن د چێکرنا خوارنێ دا، ژبەرکو بخۆ ب کێماسی دبینن، بەلێ د بنەرەتدا چێکرنا خوارنێ حەزا زەلامی یە و گۆت: هەکە ئەم سەحکەینە خوارنگەهان دێ بینین هەموو شێفێن وان زەلامن و هەر ژن ناهێنە دیتن، ژبەرکو چێکرنا خوارنێ حەزا زەلامیە و د بەریکانێن جیهانی دا یێن چێکرنا خوارنان دناڤبەرا شێفێن ژن و زەلام دا، زەلام سەرکەفتیترن، لەوما د جڤاکێ مەدا هەکە زەلام خوارنێ نەچیکەت ژی هەر چنەبیت بلا هاریکاریا ژنێ بکەت.
