رەمەزان و رۆژیگرتن د شكەفتان دا
خالد ئەحمەد بادی
ناڤودەنگێن مللەتێ كوردێ موسلمان زۆرە و مێرانی و هێرش لسەر مللەتێ كورد و بەرگریكرنا كوردان ژ ئیسلاما پیرۆز ژ دوژمنێن ئیسلامێ و بەرگریكرن و پێشكەفتنێن مللەتێ كورد بۆ ئایینێ پیرۆزێ ئیسلامێ كرین ددیار و بەرچاڤن. مللەتێ كورد ئایینێ ئیسلامێ پاراستی یە, كوردان ب دەهان بەلكو ب سەدان شۆرەش و بەرخودان ئەنجامداینە و ئەم دێ ل ڤێ گۆتارێ باسێ رۆژانێن شۆرەشا گولانا پێشكەفتنخواز كەین كو دەم و جه سالا(1987)ێ‌دەڤەرا بەرواری بالا ل گوندێ كانی مەزنێ و ل گەلیێ بازێ و ناڤێ شكەفتێ شكەفتا بابەكرا بوو شكەفتا ناڤبری دكەڤیتە گەلیێ بازێ ل نێزیك گوندێ كانی مەزن و بێلیزانێ و دكەڤینە دگەلیێ دسەر گوندێ بازێ دا بۆ لایێ باشوری و دكەڤیتە رۆژهەلاتێ گوندێ بێلیزانێ و رۆژئاڤایێ گوندێ بێشیل و كانی مەزنێ و نێزیكی (4 – 5) كلم یا ژ ڤان گوندان دویرە دكەڤیتە دبەرێ كۆپێ چیایێ مەتینی دا. چەند خەلكێ دەڤەرێ ل بیرە هەر ناڤێ ڤێ شكەفتێ شكەفتا بابەكرا یە و ڤێ شكەفتێ زۆر خزمەتا شۆرەشێن كوردی و ب تایبەت شۆرەشێن ئیلۆن و گولانێ و شۆرەشگێران كریە. شكەفتا بابەكرا ئێك ژدێرینترین جهێن شینوارا یە ل دەڤەرێ و زۆر چیرۆك و چیڤانۆكێن خۆش و درێژ لسەر شكەفتا بابەكرا هاتینە گۆتن. رەوشەنبیر و شارەزایێن وێ دەڤەرێ دگۆتن ئەڤ شكەفتە زۆر یا ناڤدارە و زۆر خزمەتا دەڤەرێ و شۆرەشگێران كریە. ل سالا1987 رەوشا دەڤەرێ تێكچوو و شەڕ دروستبوو و هێرشێن حوكمەت و جێش و جاشان هاتنە سەر دەڤەرێ، ئەم نەچاربووین و رەڤین چووینە د شكەفتا بابەكرا ڤە كو ئەم (52) سەرۆك خێزان بووین و بۆ ماوەیێ نێزیكی سێ هەیڤان ماینە د ناڤا شكەفتا بابەكرا ڤە و هەیڤا رەمەزانا پیرۆز ب سەر مە دا هات, د ناڤا شكەفتێ دا مە رێورەسمێن خۆ یێن ئایینی دكرن و رەمەزان و رۆژیێن خۆ ژی مە دگرتن و هەمی نڤێژ و خوتبە مە دكرن ل ناڤ وێ رەوشا خراب و نەخۆش دا هەمی رۆژی گرتن و ب شەف دا پاشیڤێ د شكەفتێ ڤە خۆین و ژبەر كو نەشیایین ئاگری ژ دەرڤەیی شكەفتێ هەل بكەین ژبەر دوژمنی دا ئێكسەر مۆشەك و تۆپان هاڤێنە مە، لەوما نەچار دبووین ل ناڤا شكەفتا ناڤبری دا دا ئاگران هەلكەین ژبۆ ئامادەكرنا زادی و شكەفتی و پڕ دبوو ژ دیكێلێ و هەتا پیچەكا خوارنێ هاتبا ئامادەكرن چاڤێن مە هەمیان دبوونە سركا رۆندكان. ب رەخ شكەفتێ ڤە كەڤیێن بەفرێ هەبوون و لبەر دەرێ شكەفتێ كانیەكا بۆش هەبوو كو ئاڤا وێ ژبن كەڤیێن بەفرێ دهات و مە بكاردئینا و ب ڤی شێوەیی شۆرەشگێر و خەباتكەران بەهنگاریا دوژمنی دكر و كاروانێ ژیانێ برێڤەدبر، هەردیسا هەمی فاڕگۆنێن شەمەندەفرا ژیانێ بەرەف ئاراستەیا خۆیا دروست دچوو و كوردان و شۆرەشگێر و خەباتكەران ب ڤی شێوەیی خەباتا خۆ دكر و نەتەوە و كەرامەت و ئایینێ خۆ ژی دپاراست و خەباتا خۆ ژی دكر و پیرۆزیا نەتەوەیی و ئایینی و گشتی پێكڤە و د هەمی قووناغان دا پاراستی یە, ل دوماهیێ دبێژم ودیار دكەم كو مللەتێ كو ئەگەر ل كیڤە بیت و د رەوش دا بیت ئایینێ خو ژبیر ناكەت و ئەڤە ژی وێ چەندێ دگەهینیت یێ حەز ژ نەتەوا خۆ بكەت دێ حەز ژ ئایینێ خۆ ژی كەت و هەمی ئایین ل دەڤ كوردان جهێ رێزگرتنێنە.
