ئاریشـەیێن ژ کـێمبوونا B12 پەیـدادبن
ڤیتامین B12 ماددەیەکێ خۆراکی یێ سەرەکییە کو لەشێ مرۆڤی پێدڤی پێ هەی بۆ دروستكرنا ووزێ و كاركرنا سیستەمێ دەماران و كێمبوونا وی دناڤ لەشی دا چەندین ئاریشان بۆ ساخلەمییا مرۆڤی دروستدكەت. مالپەڕێ هێلز لاین دیاركریە، چەند كێشەیەك هەنە ئەگەر دناڤ لەشێ مرۆڤی دا دروستبوون نیشانن بۆ كێمبوونا ڤیتامین B12، ئەوژی:
-1 ماندیبوون: ماندیبوونا بەردەوام یا لەشی ب ئەگەرەكێ زور ژبەر كێمبوونا ڕێژەیا B12 یە دناڤ لەشی دا.
-2 زەربوون یان سپیبوونا ڕەنگێ پیستی: كێمخوینییا پەیوەندیدار ب كێمییا B12 ڤە ڕەنگێ پیستی زەر دكەت، ژبەر نەبوونا خڕۆكێن سوور یێن خوینێ یێن تەمام پێگەهشتی و ساخلەم دناڤ لەشی دا.
-3 سەرئێشان: سەرئێشانا بەردەوام ژ بەربەلاڤترین نیشانێن كێمییا ڤیتامین B12 یە.
-4 خەمووكی: كێمییا B12 مەترسییا توشبوونێ ب خەمۆكییێ زێدەدكەت، ژبەركو دبیتە ئەگەرێ بلندبوونا ئاستێ ترشێ ئەمینی یێ گوگردی كو دبێژنێ هۆمۆسیستین. ئەڤە ژی دبیت ببیتە ئەگەرێ گەشەكرنا خەموكییێ ب ئەگەرێ زێدەبوونا فشارا ئۆكسجینی و تێكچوونا DNA و مرنا خانان د لەشی دا.
-5 كێشەیێن گەدە و ڕوویڤیكان: كێمییا B12 دبیت ببیتە ئەگەرێ زكچوون، قەبزبوون و غازات و چەندین ئاریشێن دی یێن گەدە و ڕوویڤیكان.
-6 ب زەحمەتكەفتنا تەركیزكرنێ: ژبەركو كێمییا B12 كارتێكرنەكا نەرێنی ل سەر سیستەمێ دەمارێن ناڤەندی دكەت و دبیتە ئەگەر مرۆڤ هەست ب گێژبوونێ بكەت و كێشە د تەركیزكرنێ دا بۆ دروستببن.
-7 ئێشان و هەوكرنا دەڤ و ئەزمانی: هەوكرن و سووربوون و ئێشانا ئەزمانی و دەڤی دبیت نیشانەك بیت بۆ كێمبوونا B12.
-8 تێكچوونا دیتنێ: كێمییا B12 دناڤ لەشی دا دبیت ببیتە ئەگەرێ پەیداكرنا ئاریشان د دیتنێ دا.
-9 تێكچوونا هەڤسەنگییا لەشی: تێكچوونا هەڤسەنگییێ نیشانەكا دەمارایە كو دبیت ب ئەگەرێ كێمبوونا B12 دروست ببیت و ئەو كەسێن كێمییا B12 هەبیت كێشە د ڕێڤەچوون و هەڤسەنگییێ دا بۆ دروست دبن.
