ب چاڤدێریا پارێزگارێ دهۆكێ هه‌وه‌كا به‌رفره‌هـ یا دارچاندنێ هاته ئه‌نجامدان
زنار تۆڤی:
ب هه‌لكه‌فتا ژ دایكبوونا بارزانییێ نه‌مر وسه‌رهلدانا باژێرێن دهۆك وسێمێلێ وئامێدیێ وجهێن دیتر ل پارێزگه‌هێ، ل رۆژا پێنجشه‌مبی و ب چاڤدێریا « د.عه‌لی ته‌ته‌ر» پارێزگارێ دهۆكێ هه‌وێن دار چاندنێ ل جهێن جودا هاتنه ئه‌نجامدان، ل گورستانا دهۆكێ یا نوو ل سه‌رته‌نگێ ل قەزا سێمێلێ وب ئاماده‌بوونا د. عه‌لی ته‌ته‌ر پارێزگارێ دهۆكێ و خه‌لیل مه‌حمود قائمقامێ سێمێلێ وعه‌مید جه‌مال سه‌عدو كوركی فه‌رماندێ هێزا دهۆك یا پاراستنا ژینگه‌هێ وچه‌ند به‌رپرسێن حزبی وئیداری، رێڤه‌به‌ریا دارستانان ل دهۆكێ ب هه‌ڤكاری ل گه‌ل ئێكه‌تیا زانایێن ئاینی ل دهۆكێ هه‌وه‌كا دار چاندنێ هاتە ئه‌نجامدان و پتر ژ دو هزار داران ل ناڤ گورستانا نوو هاتنه چاندن.
پاشی ل گوندێ ئاشه‌وا یێ سه‌ر ب دەڤەرا سه‌رسنكێ ڤه ب ئاماده‌بوونا پارێزگارێ دهۆكێ و ده‌ڤه‌ردارێ ئامێدیێ وارشین سه‌لمانی وچه‌ند به‌رسێن ئیداری ل ده‌ڤه‌رێ و خه‌لكێ گوندێ ناڤبری هه‌وه‌كا دار چاندنێ هاته ئه‌نجامدان، هه‌ر دناڤا به‌رنامێن وێ هه‌وێ دا ل سه‌نته‌رێ ناحیا زاویته ب ئاماده‌بوونا پارێزگارێ دهۆكێ وفه‌رماندێ هێزا دهۆك یا پاراستنا ژینگه‌هێ ورێڤه‌به‌رێ ناحیا زاویته هه‌وه‌كا دار چاندنێ دناڤبه‌را هه‌ردو جادێن سه‌ره‌كی ل زاویته هاته ئه‌نجامدان.
