دووماهیا ڤێ مەهێ پڕۆژەیێ كارەبا 24 دەمژمێری ل دهۆكێ دێ هێتە بجهئینان
هەولێر، قائید میرۆ:
بڕیارە دووماهیا ڤێ مەهێ پڕۆژەیێ رۆناهی بۆ دابینكرنا كارەبا 24 دەمژمێری ل پارێزگەها دهۆكێ ژی دێ هێتە بجهئینان و ل دەستپێكێ دێ كارەبا زێدەتری نەهـ هزار پشكداران ل سەنتەرێ باژێڕی بیتە 24 دەژمێری و د قووناغێن دووڤ دا دێ تاخێن باژێڕی ڤەگریت.
ژێدەرەكی ل پارێزگەها دهۆكێ بۆ رۆژناما ئەڤرۆ دیاركر، بەرهەڤی بۆ پڕۆژەیێ رۆناهی هاتینەكرن و بڕیارە ل دووماهیا ڤێ مەهێ پڕۆژەیێ رۆناهی بۆ دابینكرنا كارەبا 24 دەمژمێری ل پارێزگەها دهۆكێ ژی بكەڤیتە د بیاڤێ بجهئینانێ دا، ل دەستپێكێ پڕۆژەیێ رۆناهی ل سەنتەرێ باژێڕی دێ هێتە بجهئینان و 9 هزار 200 پشكدارێن كارەبێ دێ كارەبا وان ببیتە 24 دەمژمێری، قووناغێن د دووڤ دا دێ ل تاخێن دی یێن باژێڕی و دەڤەرێن سەر ب پارێزگەها دهۆكێ ڤە كارەب بیتە 24 دەمژمێری.
وی ژێدەری گۆت: «پڕۆژەیێ رۆناهی دێ كاریگەری ل سەر رەوشا كارەبێ هەبیت و د بەرژەوەندیا وەلاتیان دایە، چونكی پشتی چەندین سالێن نەبوونا كارەبا پێدڤی دێ وەلاتی بنە خودانێ كارەبا 24 دەمژمێری و ژینگەها باژێڕێ دهۆكێ ژی دێ پاقژبیت، ئەگەر د بەرژەوەندیا گشتی دا نەبیت، حوكمەتا هەرێما كوردستانێ ئەڤی پڕۆژەی ئەنجام نادەت، بەلێ چارەسەریا ئێكانە یا ئاریشا كارەبێ ئەنجامدانا پڕۆژەیێ رۆناهیە».
