خەلكێ هێتووتێ دخوازن گۆڕستانا گوندێ وان بهێتە پەرژانكرن
سندس سالح سلێڤانەیی:
هژمارەكا ئاكنجیێن گوندێ هێتۆتی داخوازێ ژ سەرۆكاتیا باژێرڤانیێ دكەن گۆڕستانا گوندێ وان بهێتە پەرجانكرن، ژبەركو بوویە جهێ بەرمایك و گلێشی و دبێژن ژی پتری شەش هەیڤانە بڕیار هاتیە دان بهێتە چێكرن، لێ هەتا نوكە دەست پێ نەكرینە و سەرۆكێ باژێرڤانیا رۆژهەلات ژی دبێژیت: ل نێزیك دێ ڤەدیتنەك بۆ وی جهی هێتە چێكرن.
مۆختاری گۆندی دبێژیت: گەلەك جاران مە سەرەدانا باژێرڤانیێ و هندەك جهێن دی كریە دا بهێن بۆمە سیاجێ گۆڕستانێ دانن، ژبەركو دكەڤیتە دناڤ مالان دا و خەلكەك گلێش و بەرمایكێن خوە دهاڤێتێ و ب ڤێ چەندێ ژینگەها مە دهێتە تێكدان و گەلەك بێهنێن نەخۆش ژێ دهێت و ب سوپاسی ڤە ل دووماهیا هەیڤا ئیلۆنا بۆری رەزامەندی ل سەر هات كو پەرجان بۆ گۆڕستانێ بهێتە چێكرن، لێ مخابن هەتا نوكە دەست پێ نەكریە.
حەمید، وەلاتیەكێ دی یێ وی گوندی یە مالا وی دكەڤیتە بەرامبەر وێ گۆڕستانێ دبێژیت: ل هاڤینێ مە چ خۆشی ب خوە نینە ژبەر بێهنا گلێش و بەرمایكێن مالان و هەتا ئەم نەشیێن دەرگەه و پەنجەرێن خوە ڤەكەین، لەورا هەكە گۆڕستان هاتبا پەرجانكرن دا بۆ مە گەلەك باش بیت و مە ژ نەخۆشیان پارێزین و دخوازین باژێرڤانی لەزێ د دانانا وی پەرجانی دا بكەت.
ئەندزیار بریندار عارف سەرۆكێ باژێرڤانیا دهۆك رۆژهەلات، بەرامبەر داخوازیا خەلكێ گوندی گۆت: راستە رازەمەندیا هاتیە دان ئەو گۆرستان بهێتە پەرجانكرن و هندەك جادە ژی بهێنە چێكرن، لەورا ل نێزیك دێ دەست ب چێكرنا ڤەدیتنەكێ كەین و هەردەمێ پارە بۆ هاتە تەرخانكرن دێ دەست ب وی پرۆژەی هێتە كرن.
