زانكۆ جڤاكێ دگوهۆڕیت
(پ. هـ. د. حەمید باڤی)
2 ــــ 2
4- دڤیا (زانكۆ) خولێن سالانە بۆ مامۆستا و فەرمانبەرێن خوە ڤە بكەت، دا هایداری پێزانین و زانست و تەكنولۆژیا نووی ببن، كە رۆژانە و مەهانە و سالانە گوهۆڕین پەیدا دبن د بیاڤێ تەكنولۆژیایێ و شێوازێ كارگێریێ دا..، دا مفایی ژێ بكەت و وان پێزانین و تەكنولۆژیا نووی بكاربینن ژ بۆ برێڤەبرنا (زانكۆ)یێ و فێركرنا قوتابیان.
5- دڤێت (زانكۆ) گەلەك یا چالاك بیت و پێوەندیێن خورت گرێبدەت د گەل زانكۆ و دەزگەهێن زانستی، و رێكەفتنێن پێدڤی بۆ هاریكاریێ دگەلدا مۆر بكەت، و كۆنفرانسێن زانستی بكەت و زانكۆ و سەنتەرێن زانستی ونڤێسەر ورەوشەنبیران داخواز بكەت، وئەو ژی پشكداریێ د كونفراس وروینشتێن زانكۆ و دەزگەهێن دی دا بكەت، دا پێزانین و هز بیر و بۆچوونان ل گەلێك بگوهوڕن و مفای ژ شێوازێن ئێكودو بكەن.
6- پێدڤییە (زانكۆ) ڕاپرسیێ د ناڤ ماموستا وفەرمانبەر وقوتابیێن خوە دا بكەت ناڤبەین ناڤبەین و دیتن و بۆچوونێن وان وەربگریت دەربارا كێشەیێن هەین دا بلەز بهێنە چارەسەركرن و دا بێ ئاستەنگ كار باش برێڤە بچیت.
7- دڤییا (زانكۆ) پەێوەندیێن گەلەك خورت ل گەل جڤاكێ ب هەمی تەخ و چینێن خوە ڤە ئاڤا بكەت و د هەمی بیاڤان دا: ئایینی، جڤاكی، پەروەردەیی، ئابۆری، سیاسی، پیشەیی و بازرگانی، چاندن و جۆتیاری، یاسایی، خزمەت و گەشتگوزاری، هونەری، و كولتۆری، وەرزشی و هتد, و چەند سەنتەران پێكبینیت ژبۆ ڤەكۆلینێن زانستی د بیاڤێن گرنگ و سەرەكی دا، دا (زانكۆ) بشێت مللەتی هشیار بكەت ل سەر دۆزێن وەلاتی و مافێن مللەتی ب رێكا ڤەكۆلینان و خولێن رەوشەنبیری و هۆسا (زانكۆ) دێ شێت بەرێ وەلاتیان و تەخێن جڤاكی ژ رەفتار و كریارێن خراب و زیاندار و دابونەریتێن كرێت بدەتە پاش، و دێ گوهۆڕیت بەرب بكرنا كارێن باش ژ بۆ ئاڤاكرنا جڤاكەكا ساخلەم و مفادار و پاقژ و چاك.
8- پێدڤییە ستاڤێ فێركرنێ و زانستی و كارگێری ل (زانكۆ)یێ تەمام و بەردەوام بیت وكێماسی تێدا نەبیت، دا كار و بەرنامەیێن (زانكۆ)یێ وەك خوە برێڤەبچن ب دورستایی، لەوما دڤیا دامەزراندن بۆ (زانكۆ)یێ هەر هەبیت و رانەوەستیت و دڤیا مامۆستا و كارمەندێن (زانكۆ)یێ خزمەتا (زانكۆ)یێ بكەن، نە تەنها چەند دەمژمێرەكان ل (زانكۆ)یێ بیت، پاشی بچیت كارەكێ دی بكەت، و (زانكۆ) ل دەف وی تشتەكێ لاوەكی بیت.
9- دڤیا ڤەكرن و گرتنا پشكێن زانستی و سەنتەران ل دویڤ پلانەكا دارێژتی و نەخشەیەكێ زانستی و ل سەر بنیاتێ خزمەتكرنا جڤاكی بیت، دا دەرچوویێ بێكار پەیدا نەبیت و جڤاك ژی د چ بیاڤێن خزمەتكرن و كاری دا (مەحتل) نە بیت.
10- دڤیا (زانكۆ) بزاڤێ بۆ زێدەكرنا داهاتێ خوە بكەت، ب رێكا گرێدانا پەیوەندییان و مۆركرنا رێكەفتنێن پشكداریێ ل گەل دەزگەه و كۆمپانی و كارخانە و پرۆژەیێن جودا جودا.. و قوتابیێن خوە ل وێرێ بدەتە كاری و وەك (بەرهەمێن هەڤپشك) د مفادار بن، هەروەسا گرێبەستێن شیرەتكاریێ ژی ل گەل مامۆستایێن زانكۆیێ ژ بۆ كۆمپانی و دەزگەهێن جودا جودا.
11- دڤییا پەیوەندیێن (زانكۆ)یێ ل گەل دەرچوویێن وێ نەهێنە بڕین، لەوما گرنگە (زانكۆ) بزاڤێ بكەت و دەرچوویان هانبدەت دا بۆ خوە (ریكخستنەكێ) د ناڤ خوە دا ئاڤا بكەن، و لژنەیەك سەرپەرشتیا وان بكەت و هایداری دەرچوویان و جهـ و كاروبار و رەوش و كاودانێن ژیان و خزمەتا وان ببیت، و هەر چەند سالەكان نوونەرێن وان ل گەل زانكۆیێ روینشتنەكێ بكەن و هۆسا پیەیوەندی د ناڤبەرا وان و زانكۆیێ دا خورت ببیت و ببنە نوونەرێن زانكۆیا خوە ل جهێن ئاكنجی بوون و كارێ خوە.
12- گەلەكا گرنگ وپێدڤییە (زانكۆیا دهۆك)ێ دگەل زانكۆیێن دی وكەسێن بسپور وئالیێن پێوەندیدار كارەكێ نەتەوی وزانستی ئەنجام بدەن دەربارا (زمانێ كوردی)، كە هەتا نوكە كولیژ وپشكێن زمانێ كوردی ل زانكۆیان هەروەسا سەنتەر وئێكەتی ودەزگەهـ وكومەلێن كوردی – ژ بەر چەند ئەگەران- نە شیاینە ئەوێ گرنگییا پێدڤی ب (زمانێ كوردی/ زاراڤێ دەڤەرێ) بدەن ژ لایێ فەرهەنگی و رێنڤێسێ ڤە، لەوما ئەڤ پێنگاڤە دێ بیتە كارەكێ هەرە پیرۆز و مفادار بۆ جڤاكێ دەڤەرێ و دەوروبەران ژی.
13- گرنگە (زانكۆ) ب گشتی بابەتێن نیشتیمانی و نەتەوی و هێما و پیرۆزیێن مللەتی و مرۆڤایەتیێ پتر گرنگیێ پێ بدەت و بلند ڕابگریت و پتر بەرێ قوتابیان بدەتە پێگیریێ ب نیشتیمانپەروەریێ و مرۆڤایەتیێ و پێكڤەژیانێ و رەوشتێن بلند و ئادابێن گشتی و پیرۆزیێن جڤاكی و خوەپارستنێ ژ رفتار وكریارێن نە گونجای دگەل زانكۆیێ وكەسایەتیا قوتابیان.
14- گەلەك گرنگە بۆ (زانكۆیا دهۆك) و هەر زانكۆیەكا دی پویتەی ب بزاڤا (وەرگێرانێ) بدەن، ژ زمانێ كوردی بۆ زمانێن دی و بەروڤاژی، كە هندەك پشكێن زانستی و سەنتەر بۆ ڤێ مەرەمێ هەبن، و پشتەڤانییەكا باش لێ بهێتەكرن، چونكو بزاڤا وەرگێرانێ ب گشتی یا لاوازە ب تایبەتی ل (دهۆكێ) چونكو د وەختێ خوە دا رێڤەبەریا وەرگێرانێ سەر ب وەزارەتا رەوشەنبیری ڤە ل هندەك پارێزگەهان هەبوو لێ ل دهۆكێ نە بوو!.
15- گەلەك گرنگە (زانكۆ) ئاڤاهییان بۆ خوە و بۆ ڤەحەواندنا قوتابییان و ڤەحەواندنا مامۆستا و فەرمانبەران ژی (ئەگەر هەبن) ئاڤا و پەیدا بكەت وەك (مولك)، دا ژ بن بارێ گرانیا (كریا) بهێتە دەرێ.
16- هیڤییە پشك و سەنتەرێن گرێدایی تەكنولۆژیا نووی ل (زانكۆیا دهۆكێ) بهێنە ڤەكرن ژ بۆ خزمەتكرنا مللەتی و وەلاتی مینا: مۆبایل، درۆن، زیرەكیا دەستچێكەر.. هـ. د.
بێگومان ب بەرچاڤ وەرگرتنا ڤان خالێن بۆرین هەتا ڕادەیەكی باش دێ (زانكۆ) پیشكەڤیت، و دێ پتر خزمەتا جڤاكیێ كەت و دەرچوویێن وێ ژی دێ باشتر دەلیڤەیێن كاری بۆ خوە ڤەبینن و ژیانا وان دێ بەختەوەرتر بیت، و زانكۆ دێ شێت جڤاكیێ بەرەف باشتر بگوهۆڕیت.
و دەربارا هەرسێ خالێن گرێدایی: (پەیداكرنا بۆدجا دارایی یا گونجای بۆ زانكۆیێ، و دامەزراندنا مامۆستا و فەرمانبەران بۆ زانكۆیێ، و پێدانا دەستهەلاتان ب زانكۆیێ) حوكمەت ژێ بەرپرسە هیڤییە چارەسەر بكەت.
