ئەمریکا سیاسەتا خوە ل سووریێ دگوهۆڕیت
رۆژنامەیەکا ئەمریکی دیار دکەت، ئیدارا ترامپی ژ کریارێن حوکمەتا ئەحمەد شەرعی رازی نینە، ب تایبەتی ژی روودانێن ل دەڤەرێن عەلەویان و ل سوەیدا وەسا کریە ئەمریکا ئێدی پشتەڤانیێ ل دەستهەلاتەکا ناڤەندی ناکەت و نها ئەمریکا پشتەڤانیێ ل سیستەمێ نە ناڤەندی ل سووریێ دکەت.
رۆژنامەیا واشنتۆن پۆست یا ئەمریکی د راپۆرتەکێ دا ئاماژە ب ڤێ یەکێ کریە، ئیدارەیا ئەمریکا ژ کریارێن دەستهەلاتا ئەحمەد شەرعی گەلەک توورە یە، ب تایبەتی ژی کوشتنا ب سەدان وەلاتیێن سڤیل ل دەڤەرێن عەلەویان و دورزیان وەسا کریە ئێدی ترامپ وەکو بەرێ پشتەڤانیێ ل ئەحمەد شەرعی ناکەت و نها نوونەرێ تایبەت یێ ئەمریکا بۆ کاروبارێن سووریێ ئانکو تۆم باراک ژی پشتەڤانیێ ل سیستەمێ نە ناڤەندی ل سووریێ دکەت و ئەو یەک دێ کاریگەریا خوە ل سەر روودانێن ل سووریێ هەبیت، چونکی بەرپرسێن ئەمریکا بۆ ترامپی دیار کرینە، هەکە سنۆرەک بۆ دەستهەلاتا نها یا شامێ نەهێتە دانان دێ چەکدارێن توندرەو ل ژێر ناڤێ لەشکرێ سووریێ دەست ب کوشتنا وەلاتیێن سڤیل کەن و ب تایبەتی ژی کریارێن ل سوەیدا بووینە جهێ دلگرانیا ئەمریکا.
هەمان رۆژنامێ ئەو یەک ژی دیار کریە، کو بەری چەند رۆژان تۆم باراکی د داخویانیەکێ دا دیار کریە، دڤێت سیستەمێ بهێت یێ سووریێ سیستەمەک نە ناڤەندی بیت دا هەموو پێکهاتەیێن ل سووریێ بشێن د سووریایەک نوو دا پێکڤە بژین، ئەو یەک ژی نیشا ددەت سیاسەتا ئەمریکا ل هەمبەر سووریێ هاتیە گوهۆڕین و وەکو بەری نها ئەمریکا بەرهەڤ نینە پشتەڤانیێ ل ئەحمەد شەرعی بکەت، کو چەکدارێن وی ل سوەیدا پتر ژ هزار وەلاتیێن سڤیل کوشتن و بەرێ وی ژی ل دەڤەرێن عەلەویان ب هەمان شێوەیی خەلکێ سڤیل دانە کوشتن، ژ بەر ڤێ یەکێ دبیت د دەمەکێ نێزیک دا گوهۆڕینێن مەزن ل سووریێ روو بدەن.
ل ئالیێ دی فەوزا یوسف ئەنداما شاندێ رێڤەبەریا خوەسەر ژی دیار کر، ئەو پشتەڤانیێ ل سیستەمەک نە ناڤەندی ژ بۆ سووریێ دکەن، چونکی دێ وەسا پرسێن هەی هێنە چارەسەرکرن و هەبوونا رێڤەبەریا خوەسەر چو مەترسیا خوە بۆ سووریا نوو نینە و هەروەسا هەتا ئالۆزیێن ل سووریێ بەردەوام بن بێگومان دڤێت هەسەدە خەلکێ خوە پارێزیت و داخوازیێن ژ بۆ دەست ژ بەردانا ژ چەکی ژی بێگومان د جهێ خوە دا نینن و هەسەدە ب چو رەنگەکێ کارەک وەسا ناکەت و دڤێت هەموو پرسێن هەی ژی بهێنە چارەسەرکرن و گۆت: (هەلوەستێ نها یێ شامێ د خزمەتا چارەسەریێ دا نینە، چونکی دڤێت هەموو مافێن گەلێ کورد د دستوورێ نوو یێ سووریێ دا بهێنە گەرەنتیکرن و گرنگە شام ژی دەست ژ سیاسەتا خوە یا شاش ل هەمبەر رێڤەبەریا خوەسەر و کوردان بەرەت، چونکی یا نها شام دکەت د بەرژەوەندیا سووریێ دا نینە).
