کورد و تورک دێ پێکڤە تورکیایەک نوو ئاڤا کەن
ب، سه‌رجان مەحمود:
سەرۆکێ پەرلەمانێ تورکیا راگەهاند کۆمسیۆنا نها ل پەرلەمانی هاتیە ئاڤا کرن کار دکەت دا ئاشتی ل تورکیا بهێتە بجهکرن، بێگومان نها ل تورکیا قووناغەکا دیرۆکی دەستپێکریە و کورد و تورک دێ پێکڤە تورکیایەک نوو ئاڤا کەن و هەموو پرسێن هەی ژی دێ هێنە چارەسەرکرن.
نومان کورتولمیش سەرۆکێ پەرلەمانێ تورکیا بۆ دەزگەهێن راگەهاندنێ دیار کر، نها قووناغەکا نوو و دیرۆکی ل تورکیا دەستپێکریە، شەڕێ چەندین سالان بەر ب دووماهیێ ڤە دچیت و هەموو هێزێن سیاسی ل تورکیا پشتەڤانیێ ل ئاشتیێ دکەن و ئەو یەک ژی گەلەک گرنگە و گۆت: (نها کۆمسیۆنەک ژ بۆ ئاشتیێ و براتیێ هاتیە ئاڤاکرن، هەتا نها چەندین کۆمبوون ژی هاتنە کرن، کارێ ڤێ کۆمسیۆنێ گوهۆڕینا دستوورێ تورکیا نینە، یان ژی وەکو هندەک کەس بەحس ژێ دکەن کار بۆ ئازادکرنا ئۆجەلانی یان ژی ئاڤاکرنا هەرێمەکێ بۆ کوردان نینە، بەلکو کارێ سەرەکی یێ ڤێ کۆمسیۆنێ ئەڤە دا زەمینەیەکا نوو بۆ ئاشتیێ و برایەتیێ د ناڤبەرا کوردان و تورکیا دا بهێتە دروست کرن، هەتا نها ژی کارێن گەلەک باش هاتینە کرن و پشتی کۆمسیۆن کارێ خوە ب دووماهی ئینا وی دەمی دێ دەست ب قووناغەکا دی هێتە کرن، چونکی گەلەک تشتێن دی هەنە دێ ل پەرلەمانی هێنە ئێکلا کرن).
سەرۆکێ پەرلەمانێ تورکیا ئەو یەک ژی دیار کر، هەتا نها کارێن گەلەک باش هاتینە کرن، ژ بلی پارتەکا سیاسی هەموو پارتێن دی چ یێن ل پەرلەمانی چ یێن ل دەرڤەیی پەرلەمانی پشتەڤانیێ ل ئاشتیێ دکەن، هەر کەس دزانیت نها پێدڤیا تورکیا ب ئاشتیێ و برایەتیێ هەیە، کورد و تورک ب سالانە ل سەر سەر ڤێ ئاخێ پێکڤە دژین، بێگومان نها دەم هاتیە پرسێن هەی دوور ژ شەڕی بهێنە چارەسەرکرن و گۆت: (ژ بەر ڤێ یەکێ ژی ئەم دبێژین کورد و تورک دێ پێکڤە تورکیایەک نوو ئاڤا کەن، تورکیا وەلاتێ کوردان، تورکان، عەرەبان و هەموو خەلکێن دی یە یێن ل تورکیا دژین، مە دڤێت ئەم پێکڤە ب ئاشتیانە بژین، ژ بەر ڤێ یەکێ ژی نها قووناغەکا نوو و دیرۆکی دەستپێکریە و دڤێت ئەم هەموو پێکڤە کار بکەین دا نەهێلین ئەڤ دەلیڤەیا زێرین ژ دەست بچیت).
ناڤهاتی د دووماهیا ئاخڤتنا خوە دا ئەو یەک ژی دیار کر، دڤێت هەموو هێز و ئالیێن سیاسی ل تورکیا هەست ب بەرپرسیاریا خوە یا دیرۆکی بکەن، چونکی هندەک هێز هەنە دخوازن ئاستەنگان ل هەمبەر قووناغا ئاشتیێ دروست بکەن، ژ بەر ڤێ یەکێ ژی دڤێت ئەم رێ نەدەین تشتەک وەسا روو بدەت، ئەڤ قووناغە بۆ هەموو تورکیا یا گرنگە و دڤێت هەموو هێزێن سیاسی، رەوشەنبیر، رۆژنامەڤان، کەسێن ئەکادیمی و هەموو وەلاتیێن تورکیا پشتەڤانیێ ل قووناغا ئاشتیێ و دیموکراسیێ ل تورکیا بکەن.
