پـارتـی ملەتە
فازل عومهر
پارتی ژ ڕۆژا دامەزراندنێ لسەر دەستێ بارزانیێ نەمر تاكو ئیرۆ، سەرەكانیا ھزرێن خوە ژ ڕێبازا بارزان وەرگرتینە، نەخاسمە ھزر و ڕەفتارێن شێخ عەبدلسەلام و شێخ ئەحمەد و بارزانیێ نەمر… ئەڤێ ڕێبازا د بەروەختێ خوە را كری، لسەر ھندەك ستوونان ئاڤا بوویە، درەنگتر خەلكی گرنگیا وان زانیە، وەكی؛ ئازادیا مرۆڤی، دادیا جڤاكی، ژینگەھپارێزی، مافێن ژنێ، پێكڤەژیانا نەتەوەیی و دینی،..ھتد.
دامەزرانا پارتی وەكو پارتەكا كوردستانی لسەر ئەڤان بنەمایان و سیاسیكرنا ئەڤان تێگەھێن مرۆڤانی و گشتی د ناڤێ خوە دا (دیمۆكرات و كوردستانی) و خەبات كرن داكو ئەوان ھزران ل ژیوارێ كوردستانێ پراكتیزە بكەت، پارتی كرە دەنگێ ھەمی خەلكێ كوردستانێ و ھەمی لدۆر پەیام و درووشمێن وێ كۆم بوون و كۆم دبن؛ كوردێن بسورمان و ئێزدی و كاكەیی، مەسیحی ب ھەمی ئایینێن خوە ڤە، ئەرمەن و توركومان و ئەرەبێن كوردستانێ ژی ئارمانجێن خوە دگەل پارتی دبینن و ڕۆژ بۆ ڕۆژێ، ڕۆلێن ئەرێنی و ئاڤاكەر دگێرن،… بەلگە بۆ گۆتنا من ئەوە؛ ھەر جھێ پارتیان دەستھەلات لێ ھەبوویە، ئێمنتر و ئاڤەدانتر بووینە ژ جھێن دی.
ھەر جھێ پارتیان دەستھەلات لێ ھەبوویە، پێكڤەژیانا نەتەوەیی، پێكڤەژیانا دینی و ئایینی،… ب خوە پێكڤەژیانا سیاسی ژی، باشتر بوویە ژ ھەمی جھێن دی ل سەرانسەری ئیراقێ.
ھەر جھێ پارتیان دەستھەلات لێ ھەبوویە، ئازادیێن تاكەكەسی و كۆمان باشتر بووینە و قانوون بەڕەڤانێ ھەمیان بوویە.
ھەر جھێ پارتیان دەستھەلات لێ ھەبوویە، مافێن مرۆڤی و مافێن نەتەوەیی و دینی باشتر بووینە، لەو، ھەڤبەندیا ھەمی كێمارێن نەتەوەیی و دینی ل كوردستانێ، دگەل پارتی گەوھەریە و گەھشتیە ڕادەیا تەنگژاندنا ھێزین نەحەز.
ھەر جھێ پارتیان دەستھەلات لێ ھەبوویە، گرنگی ب ژینگەھێ ھاتیە دان و ڕۆژ بۆ ڕۆژێ ڕووبەرێ شینكاتیێ ھاتیە پاراستن و زیندەوەر ھاتینە پاراستن.
ھەر جھێ پارتیان دەستھەلات لێ ھەبوویە، ئاڤەدانی و پێشكەفتن، لێ ھەبوویە… تاكو وێ ڕادەیێ، چاڤدێرێ بوژدان ھەست دكەت پارتی و ئاڤەدانی جێمكن. لەو، وەسا دھێتە ھزركرن و پێشبینكرن كو ل ڕۆژا دەنگدانێ، لیستا 275 لیستا كوردستانیان ب ھەمی چین، تەخە، نەتەوە، دین و ئایینان ڤە، وەكی ھەرجار جھێ باوەریا خەلكێ كوردستانێ بت و ببتە لیستەكا مەلیۆنی و خەلكێ كوردستانێ بۆ دۆست و دوژمنان بورھان بكەن، كو پارتی و كوردستان ئێكن و بیبلكێن چاڤانن.
