من کەڤالێن خوە هەتا ب هزار دۆلاران فرۆتینە
بێوار حەمدی:
شێوەکارێ گەنج ( ئاریان لەتیف) د دیدارەکێ دا بۆ بەرپەرێ هونەری یێ ڕۆژناما ئەڤرۆ گۆت: پتری 10 سالانە ئەز کارێ شێوەکاریێ دکەم، هەر چەندە تایبەتمەندیا من نەبوو وەکو خواندن لێ ژ بەر حەزا من یا زێدە من شێوەکاری هەلبژارت.
ناڤهاتی د بەردەوامیا ئاخفتنا خوە دا دیار کر کو شێوەکاری دەربڕینا ناخێ هونەرمەندیە و پێدڤی یە هەموو شێوەکاران پەیامەک ل پشت کارێ خوە هەبیت و گۆت: من پشکداری د ناڤ 24 پێشانگەهێن جوراوجورداکریە و 12 پێشانگەهێن نێڤدەولەتی وەکو تورکیا، یونان، ئسپانیا، فەرەنسا، ئیتالیا و من کەڤالێن خوە ژ 500 هەتا 1000 دولاران فرۆتینە.
ئاریانی گۆت: هەموو شێوەکاران شیانێن وێ چەندێ نینن کو پەیکەران دروست بکەن، بتنێ ئەو نەبن یێن کو ب ڕێیا ئەکادیمی خواندبیت یان ژی گەلەک ل سەر شیانێن خوە کارکربیت داکو بشێت ژ دەرهەق بدەرکەڤیت، یوتیوب ماموستایەکێ گەلەک باشە بۆ وان کەسێن دڤێت خوە فێری شێوەکاریێ بکەن، یان ژی دشێت بڕێیا وەرگرتنا خۆلەکا تایبەت لێ ئەو خۆل دڤێت یا ئۆنلاین نەبیت داکو پتر بشێت مفای وەرگریت.
