مارك ساڤایا: دەلیڤەیەكا دیرۆكی یا ل بەر ئیراقێ تاكو ببیتە دەولەتا قانوونێ نەك دەولەتا چەكی
هنارتیێ تایبەتێ دۆنالد ترەمپی بۆ ئیراقێ، د پەیامەكا گرنگدا راگەهاند: ئەڤرۆ جیهان ب چاڤەكێ پڕ ئومێد دنێریتە ئیراقێ وەك وەلاتەك كو شیانێن وێ چەندێ هەنە رۆلەكێ مەزنتر و كاریگەرتر ل دەڤەرێ بگێریت، بەلێ ئەڤە یا گرێدایە ب وێ چەندێ كو دۆسێیا چەكێ ژ دەرڤەی دەستهەلاتا دەولەتێ ب تمامی بهێتە ئێكلاكرن و هەیبەتا دەزگەهێن فەرمی بهێتە پاراستن.
مارك ساڤایا، هنارتیێ ترەمپی بۆ ئیراقێ دوپاتی ل وێ چەندێ كر» هیچ ئابۆرەك نەشێت گەشێ بكەت و هیچ هەڤپشكییەكا نێڤدەولەتی یا سەركەفتی نابیت د سەقایەكیدا كو سیاسەت تێكهەلی هێزا نەفەرمی و چەكدار بیت، لەوما نوكە دەلیڤەیەكا دیرۆكی د پێشبەری ئیراقێدایە بۆ وێ چەندێ دووماهیێ ب ڤێ قووناغێ بینیت و وێنەیێ خوە وەك دەولەتەك ب هێز بكەت كو ل سەر بنەمایێ سەروەرییا قانوونێ هاتیە ئاڤاكرن، نەك ل سەر هێزا چەكی».
ب باوەرییا ساڤایا» جهگیركرنا پرەنیسپێ جوداكرنا دەستهەلاتان و رێزگرتن ل چارچۆڤەیێن دەستووری و رێگریكرن ل هەر دەستێوەردانەكێ كو بڕیارا سیاسی ئیفلیج بكەت یان سەربخوەییا دەولەتێ لاواز بكەت، پێنگاڤەكا ئێكلاكەرە، نەتەوەیێن ب هێز وەختێ دروست دبن كو دەستهەلاتێن بجهئینانێ، قانووندانانێ و دادوەری د چارچۆڤەیێ دیاركریێ خوەدا كاربكەن و ب رێكا میكانیزمێن قانوونی یێن رۆهن لێپرسین ل گەل بهێتە كرن، نەك ب رێكا فشار و سەنتەرێن كاریگەریێ ڤە».
د پشكەكا دی یا ئاخڤتنێن خوە دا، هنارتیێ سەرۆكێ ئەمریكا بۆ ئیراقێ گوت» ئیراق ل پێشبەری دووریانەكا چارەنڤیسسازدایە، یان بەر ب دەزگەهێن سەربخوە دچیت كو شیانێن سەپاندنا قانوونێ و راكێشانا وەبەرهێنانێ هەیە، یان دێ زڤریت بۆ وی بازنەیێ ئالۆز كو وەختەكێ درێژە بوویە بارگرانی ل سەر ملێ هەموویان».
ل دووماهیێ مارك ساڤایا راگەهاند» ئەوا ئەڤرۆ پێدڤی پێك دهێت ژ پشتەڤانیكرنا رێڕەوێ وەلاتی، رێزگرتن ل دەستوور، ب هێزكرنا جوداكرنا دەستهەلاتان و پێگیریبوونەكا ب هێز ب پێنگاڤێن كریاری بۆ دوورئێخستنا چەكی ژ مەیدانا سیاسی، چونكە ئەڤە تاكە رێكە بۆ ئاڤاكرنا ئیراقەكا ب هێز كو رێزگرتنا جیهانی ب دەستڤەبینیت».
