قووناغەکا نوو ل رۆژئاڤایێ کوردستانێ دەستپێکریە
بسپۆرەکێ زانستێن سیاسی دیار دکەت، ئێدی تشتەک ب ناڤێ باکورێ سووریێ نەما، رۆژئاڤایێ کوردستانێ ما و دڤێت هێزێن سیاسی یێن کوردی ل رۆژئاڤایێ کوردستانێ پێداچوونێ د سیاسەتا خوە دا بکەن و گرنگە رۆژئاڤایێ کوردستانێ بهێتە پاراستن.
د. حەمید بوز ئارسلان بسپۆرێ کاروبارێن سیاسی دیار کر، رەققە ناڤەندا نەتەوەپەرستیا عەرەبی یە ل سووریێ و بێگومان هەر کەس دزانیت کو کورد نەچار بوون بچنە رەققە و ل وێرێ شەڕێ داعشێ بکەن، لێ پشتی ژناڤچوونا داعشێ پێدڤی بوو کورد ل دۆر رەققە بریارەکا جودا بدەن چونکی هەر کەس دزانیت هۆزێن عەرەبی یێن ل رەققە هەردەم ل دژی کوردان بووینە و گۆت: (نها قووناغەکا نوو ل رۆژئاڤایێ کوردستانێ دەستپێکریە و ئێدی چو تشتەک ب ناڤ باکور و رۆژهەلاتێ سووریێ نەما، ئەو یەک ژناڤچوو و نها ئێدی رۆژئاڤایێ کوردستانێ مایە، مە دیت کا چاوا خەلکێ رۆژئاڤایێ کوردستانێ ژی بەحسێ ڤێ یەکێ کرن کو ژ بۆ وان رۆژئاڤایێ کوردستانێ هێلا سۆرە و دێ پارێزن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، دڤێت هێزێن کوردی یێن ل سووریێ پێداچوونەکا تەمام د سیاسەتا خوە دا بکەن، ئەوا ب سالان ب ناڤێ براتیا گەلان بەحس دهاتە کرن تووشی شکەستنێ هات، لێ ئەو یەک رامانا هندێ نادەت دێ کورد دژبەریا نەتەوەیێن دی کەن، بەلکو دڤێت ئێدی هێزێن کوردی باش بزانن رەوشا سووریێ گەلەک جودایە و دڤێت ل گۆر راستیا جڤاکی و سیاسی یا سووریێ کار بکەن و گۆت: (دڤێت پەیەدە و هێزێن دی یێن رۆژئاڤایێ کوردستانێ کار بۆ کوردستانیبوونێ بکەن، نها گرنگە کورد ل رۆژئاڤا وەکو کوردستانی بژین و کار بکەن، ژ بەر ڤێ یەکێ ژی گرنگە کار ل سەر وان کێماسیان ژی بهێتە کرن یێن بوونە ئەگەر ئالۆزیێن ڤێ دووماهیێ ل گەلەک دەڤەران روو دان، دڤێت هێزێن سیاسی یێن کوردی وانەیان ژ روودانێن ڤێ دووماهیێ وەربگرن).
بسپۆرێ کاروبارێن سیاسی ئەو یەک ژی دیار کر، نها ب کریاری هەبوونا کوردان ل سورویێ هاتیە قەبوول کرن، دڤێت کورد پەیوەندیێن خوە ل گەل ئەمریکا و وەلاتێن رۆژئاڤایی گەلەک بهێز بکەن، ل ئەمریکا و ئۆرۆپا پشتەڤانیەکا گەلەک مەزن بۆ کوردان هەیە و دڤێت کورد کار ل سەر ڤێ یەکێ بکەن کو ب پشتەڤانیا ئەمریکا و ئۆرۆپا خوەسەریا خوە ب سووریێ بدەنە قەبوول کرن، نها پێنگاڤا ئێکێ هاتیە ئاڤێتن و ئەو یەک ژی گەلەک گرنگە و گۆت: (گرنگە هەموو مافێن گەلێ کورد ل سووریێ د دستووری دا بهێنە گەرەنتیکرن، هەکە ئەو یەک بهێتە کرن مەترسی ژی ل سەر پاشەرۆژا کوردان ل سووریێ دروست نابن، ژ بەر ڤێ یەکێ ژی گرنگە هەموو هێزێن کوردی ل سووریێ خوە بۆ قووناغەکا نوو بەرهەڤ بکەن).
