جـاشێن دوهـی پـاشایێن ئـەڤـرۆ
خالد ئەحمەد بادی
پشكا ئێكێ
بەری چەند رۆژان ل سۆشیال میدیایێ دا من دیدارەكا كەنالێ تێلەڤزیۆنا ئیراقێ یا سەردەمێ رژێما بەعسا ژناڤچووی دیت و دیرۆكا دیدارێ ل سالا (1983) بوو كو دیدار ل گەل هندەك كەسان دكر پشكداری د شەڕەكی دا كربوو بۆ ئیراقا گەنی و ئالایێ سەركەفتنێ بۆ خو بلنددكر و ب شانازی ڤە پەسن و مەدحێن سەدامی و حوكمەتا ئیراقێ دكرن، من مانشێتێ وێ دیدارێ دیت كو ب ڤی شێوەی هاتبوو نڤێسین (جاشەكانی دوێنێ وپاشاكانی ئەمرۆ) و ب راستی مانشێت یێ سەرەنج راكێش بوو و بالا من ئێخستە سەر هزركرنا نڤێسینا بابەتێ ناڤبری، ئەڤ هەلوەست ودیمەنێن مە ب چاڤێن خۆ دیتین ل دەمێ شۆرشا گولانێ و ل ناڤ دەڤەرێن ئازادكری و ل بن سیبەرا دەستهەلات و حوكمرانیا پێشمەرگێ كوردستانێ. ب راستی چ جاران ئەو دیمەنێن وان سالان ل بەر چاڤ و د هزروبیرێن مە دانە كو رۆژانە هێرشێن جاش و جێشێن ئیراقێ ل سەر دەڤەرێن ئازادكری بوون ب مۆشەك و تۆپ و تانك و فرۆكەیان و ژبلی هێرشێن پەیادە و لەشكری كو ل وی دەمی دگۆتنێ (تقدم) ژبلی ئابلۆقە و گڤاشتنێن دارایی و چاندن و كەلوپەلان و پەرەوەردەیی و سۆتەمەنی و ئازۆقەیی و ئاهێن خوارنێ و پێدڤیێن مال و زارۆیان و هتد.. كو هەمی جۆرێن زولم و ستەمان ل شۆرشگێر و خەباتكەران دكرن ژ هەمی ئالییان ڤە، ئەگەر هزركرنەكێ د ڤی بابەتی دا بكەین كو هزرا شۆڕەش و خزمەت و بەرگریكرنێ ل جەم هەمی وان خەباتكەر و شۆرەشگێران هەبوو كو ئەوان شۆرەشگێران خانی و مال و سامان و خۆشی و ژیانا شارستانی و باوەرنامەیێن بلندێن زانستی و كۆمپانی و بازرگانی و هەمی تشت هەبوون، هەروەسا وان خەباتكەر و شۆرەشگێران ژی ئەڤ ناڤێن ل سەری مە دیاركرین وانان ژی دڤییان لێ هەستا نەتەوەیی و دلسۆزی یا كوردستان و كوردینیێ و ڤیانا خاك و وەلاتی ل سەر وان شۆرشگێر و خەباتكەران زال بوو و دەست ژ هەمی مال و ملك و مووچە و كار و بازرگانیێ بەردا و ب تنێ رێكا خەبات و شۆرەش و كوردینیێ گرتە بەر و كار و خەبات و شۆرەش كرن تا كو ئەڤ بەرهەمێن نوكە دبینین كو پەرلەمان وحوكمەتا هەرێما كوردستانێ ب دامودەزگەهین خۆڤە و ئالایێ پیرۆزێ كوردستانی و دەزگەهێن راگەهاندنێ و كارێ هونەری و بنیاتێن بهێز یێن دەولەتبوونێ یێن كوردستانێ هەمی بەرهەمێن وێ خەبات و شۆرەش و كوردایەتیێنە. هزر و ئومێدێن مللەتێ كورد د ناخێ خۆ دا ئاڤاكرین هەمی بوونە خەون و چ بنەما بوون ژ ئالیێ شۆرەشگێری و ئاغاتیێ ڤە، هەر ژ كەڤن دا مللەتێ كورد كەفتیە بن رەحما ئاغا و دەرەبەگ و شێخ و بەگان و ب هەمی شێواز و رەنگان ئەوان ئەڤ كەسانە د سەردا دبرن و گەف و ستەم ل خەلكێ بێ گونەه و سادە و مللەتێ كورد دكرن و پتریا جاران ژی ناڤ ئینایا دەستێ خۆ كریە د دەستێ دوژمنان دا و مللەتێ مە پتر چەوساندی یە و مالێ وان ژێ ستاندی یە و رەز و چەمێن وان ئاسێ كرینە و ل سەر ناڤێ خۆ تۆمار كرینە ب حیلە و گەفان و هەمی مال و ملك و خوه و ماندیبوونا هەژار و كوردپەروەران خواری یە و یێن هەژار هەژارتر لێ كرینە ل شوینا وان ئاغا ودەرەبەگان هاریكاریا وان كربایە بەرۆڤاژی كار و مامەلە و ئاراستە هاتنەكرن. مە رێزێن مەزن بۆ هەر هۆزەك و توێژەك و كەسایەتیەكێ هەنە، چونكو هندەك ئاغا و شێخ و كەسایەتی هەبووینە خزمەتا مللەتێ كورد كریە و هەبووینە ب خیانەتكاری و دوژمنكاریێ هاتینە هێڤێن و فرشككرن. زۆر هۆكار هەبووینە كۆنترۆلا مللەتێ كورد ل كوردستانێ بكەڤیتە د دەستێ ئاغا و دەرەبەگان دا.