شوون تبلێن مرۆڤی د گەردوونی دا
مرۆڤایەتیێ کۆمەکا پەیام و شوونواران بەرەڤ کووراتیا گەردوونی هنارتینە، کو دبیت بۆ ملیارەها سالان پشتی نەمانا مرۆڤی ژی هەر بمینن. ژ گرنگترین وان ئامرازێن ئەڤ پەیامە هەلگرتین، هەردو گەشتیێن ئاسمانی یێن ئاژانسا ناسا (پایۆنیر 10 و پایۆنیر 11) نە، کو ل دەستپێکا سالێن حەفتیان ژ چەرخێ بۆری هاتینە هاڤێتن.
ئەڤ هەردو گەشتیە ل دهستپێكێ بۆ پشکنینا هەسارێن وەک مەریخ و زوحەل هاتبوونە هنارتن، بەلێ پاشان ئاراستەیا وان بەرەڤ دەرڤەی کۆمەلا رۆژێ هاتە گوهۆڕین. نها “پایۆنیر 10” نێزیکی 21 ملیار کێلومەتران و “پایۆنیر 11” نێزیکی 17.5 ملیار کێلومەتران ژ ئەردی دوور کەفتینە.
هەر چەندە ل سالێن 1995 و 2003 وزەیا وان ب دووماهى هاتیە و پهيوەندی د گەل ناسا نهمايه، بەلێ ب گۆرەی یاسایا ئێکێ یا نیوتنی، ئەو دێ ب هەمان لەزاتیا خۆ (13 هزار کێلومەتر د دەمژمێرەکێ دا) د ناڤ ڤالەهیا بێ هەوادا د بەردەوام بن، چونکی چو هێزێن لێکخشاندنێ نینن وان ڕاوەستینن.
ل سەر هەردو گەشتیان، دو “پلێتێن زێرین” هاتینە نەخشکرن کو وەک ناسنامەیا مرۆڤی دهێنە نیاسین. ئەڤ پلێتە ئەڤ زانیاریێن ل خوارێ ب خۆ ڤە دگرن:
-1 وێنێ ژن و زەلامەکێ، کو زەلام دەستێ خۆ وەکی نیشانا ئاشتیێ بلند کریێ.
-2 نەخشێ گەردیلا هایدرۆجینێ، کو بەربلاڤترین توخمە د گەردوونی دا.
-3 جهێ کۆمەلا رۆژێ و هەسارا ئەردی د ناڤ گالاکسیا مە دا.
-4 قەبارێ مرۆڤی بەراورد د گەل قەبارێ گەشتیێ، دا کو بوونەوەرێن زیرەک ب قەبارێ مە بزانن.
پێشبینی دهێتە کرن “پایۆنیر 10” پشتی 2 ملیۆن سالێن دی ب لایێ ستێرا “ئەلدەبران” دا دەرباز ببیت. ئەڤ گەشتیێن ژ ئەلەمنیۆم و تیتانیۆمێ هاتینە دروستکرن، دێ بنە وەک “شوون تبلێن” مرۆڤایەتیێ. دبیت رۆژەک بهێت مرۆڤ و هەمی ئاسەوارێن ل سەر روویێ ئەردی نەمینن و ببنە تۆز، بەلێ ئەڤ پەیامە دێ د ناڤ تاریتیا گەردوونی دا مینن وەک شاهدەک کو رۆژەکێ شارستانیەتەک ب ناڤێ “مرۆڤ” ل سەر ڤی گەردوونی هەبوویە.
