تاریق خانهقینی: هونەرمەند ژ بەر مەزاختیێن زۆر گەلەک بەرهەمان چێناکەن
رهمهزان زهكهریا:
هونهرمهند تاریق خانهقینی، خودانێ ستۆدیۆیا هونهری و ئهندازیارێ دهنگی د دیدارەکێ دا بۆ رۆژناما ئهڤرۆ گۆت: د ڤان چهند سالێن دووماهیێ دا بزاڤا هونهری ب گشتی و كارێ مۆزیك و سترانێ ب تایبهتی ل ههرێما كوردستانێ پاشڤه چوویە، ئهو مهیدانا جاران ب بهرههمێن نوو و سیدی یێن هونهرمهندان ئاڤا بوو، نوكه كهفتیه بن سێبهرا بێدهنگیێ، ئهڤ چهنده نه ژ بهر كێمیا خودان شیانانه ژ ئهنجامێ زنجیرهكا هۆكارێن ئابووری و تهكنیكی یه كو هونهر بهر ب لاوازیێ بریه.
ناڤبری گۆتژی: ئێك ژ سهرهكیترین ئهگهرێن كو هونهرمهندان ژ كارێن نوی لاواز دكهت، تێچوونا زۆر و گران یا بهرههمهێنانێ یه بۆ دروستكرنا سترانهكا ب كوالیتهتهكا بلند، رهنگه تێچوونا تۆماركرنا دهنگی ب تنێ بگههیته پێنج هزار دۆلاران، ئهڤه بێی كو خهرجیێن كلیپكرن و پروپاگهندێ ههژمار كربن د رهوشهكا ئابووری یا نه جێگر دا، كو وهلاتی پتر یێ ل هیڤیا دابینكرنا پێدڤیێن ژیانێ یه نهك بهرههمێن هونهری، هونهرمهند خوه دبینیت دناڤ بازنهكێ مهترسیدار دا كو خهرجی د زۆرن و داهات یێ نهدیاره.
ناڤهاتی گۆت: ههر چهنده ههتا نوكه ژیریا چێكری (AI) نهبوویه ئهگهرێ ئێكسهر یێ راوهستاندنا كارێن هونهری، بهلێ سێبهرا وێ ل سهر پاشهرۆژێ یا دیاره شارهزا دبینن كو د نێزیك دا ژیریا چێكری دێ بیته جهگرێ ههموو پشكێن هونهری ژ ئاوازدانانێ بگره تا دهنگوباس و بەلاڤکرنق موزیكێ، ئهڤ تهكنهلۆژیا نوو، ههمان دهم كو ئاسانكاریێ دكهت، مهترسیێ ل سهر ههستێ مرۆڤایهتی د هونهری دا پهیدا دكهت و رهنگه هونهرمهندێن راستهقینه پهراویز بێخیت.
خانهقینی ئاشكراكر: رهوشا نوكه یا كوردستانێ و نهبوونا پشتهڤانیهكا دارایی یا رێكخستی بۆ كهرتێ هونهری، وهلاتی ژی بێ ئومێد كرینه جهماوهر چاڤهرێ چ نینه ئهو ژی دبینن كو كوالیتیا بهرههمان ژبهر كێم خهرجیێ بهرهڤ لاوازیێ دچیت، ئهڤ بازنهیا شكهستی ئابووریێ لاواز وهكریه كو هونهر ل جهێ پێشكهفتنێ ب رهنگهكێ گشتی ل پاشڤهچوونێ بچیت.
