هونەرمەند نەسرین شێروانی سترانێن خوە ل سەر قەوانان تۆمار کربوون
زاخۆ، دلۆڤان هالۆ:
هشیار کەریم، ئامادەکارێ ژیانناما هونەرمەندا کورد یا وەغەرکری نەسرین شێروان د دیدارەکێ دا بۆ ڕۆژناما ئەڤرۆ دیارکر کو هونەرمەندا کوردا خودێ ژێ ڕازی نەسرین عومەر شێروان ب نەسرین شێروان ناسیارە، ل سالا ١٩٢٩ـێ ل پارێزگەها شەرنەخا باکوورێ کوردستانێ ژ بنەمالەکا کۆچەر ژ دایك بوویە، ژبەر ئاریشەیێن دارایی ل گەل خێزانا خوە بەرەڤ گەلەك باژێر و دەڤەرێن باکوورێ کوردستانێ چووینە، و دوماهیك جار ل سالا ١٩٣٢ بەرەڤ باشوورێ کوردستانێ هاتینە و ل باژێڕێ زاخۆ دەڤەرێن وەکو دارهۆزانێ و قادیا ماینە.
ناڤهاتی ئاماژە ب وێ چەندێ ژی کر کو پشتی هینگێ خێزانا وێ ژ باژێڕێ زاخۆ بەرەڤ پایتەختێ ئیراقێ بەغدا چووینە، لێ نەسرین چەندەکێ ل باژێرێ زاخۆ مایە و پشتی هینگێ ئەو ژی چوویە بەغدا، ل وی دەمی نەسرین شێروان ل مالا زەلامەکێ زەنگین بناڤێ غەریب پۆزە کاردکەت کو پێشتر ئێکدوو نیاسی بوون، ل وی دەمی لگەل چەندین هونەرمەندێن کورد ئاشنا بوویە وەکو هونەرمەندان عەلی مەردان و حەسەن جزیری، و ب پێشنیارا هونەرمەند عەلی مەردان ل سالا ١٩٤٤ـێ ل ڕادیۆیا بەغدا دەست ب کاربوو، وان سترانان ل ڕادیۆیێ دبێژیت ئەوێن کو ل ژیێ گەنجاتیێ فێربوویی.
گۆت ژی:»نەسرینێ هەلبەستێن هەلبەستڤانێن کورد جگەرخوین و شێخ سەلام کرینە ستران، و لگەل گەلەك هونەرمەندێن کورد یێن وی سەردەمی وەکو محەمەد عارفێ جزیری و عیسا بەرواری و حەسەن زیرەك و تاهر تۆفیق و ڕەسوول گەردی و شەمال سائیب و کاویس ئاغا سترانێن دوو قۆلی گۆتینە، ژبلی سترانێن فۆلکۆری خودانا چەندین سترانێن خوە یێن تایبەتە کو ل سەر قەوانا تۆمار کربوون».
زێدەتر ژی گۆت:»هونەرمەند نەسرین شێروان ل سالا ١٩٧٥ـێ نەخوەش دبیت و ئەو ژی وەکو گەلەك ژ هونەرمەندێن وی سەردەمی بتنێ دمینیت، پشتی نەخوەش کەفتنا وێ دووماهیك سالێن خوە ل جاددەیێن بەغدا د بورینیت، نەسرین شێروان ل سالا ١٩٩٠ـێ ل جاددەیێن بەغدا وەغەرا دووماهیێ کر، و بتنێ چەند پارچە جلوبەرگ و ڕاچێتێن دەرمانێن نەخوەشیا خوە ل پشت خوە بجهـ هێلان».
