داخوازا دەرکرنا تۆم باراکی ل تورکیا دهێتە کرن
تۆم باراکی بالیۆزێ ئەمریکا ل تورکیا د داخویانیەکێ دا دیار کر، قووناغا ئاشتیێ یا تورکیا گەلەک گرنگە و هەکە سەر بگریت دێ کورد ل هەر چار وەلاتێن رۆژهەلاتا ناڤین گەهنە مافێن خوە و سنورێن هەی دێ هێنە راکرن و وی دەمی دبیت چار هەرێم بۆ کوردان بهێنە ئاڤاکرن، ئەو یەک ژی دێ بیتە ئەگەرێ چارەسەرکرنا پرسا کوردی ل هەموو رۆژهەلاتا ناڤین.
پشتی داخویانیا تۆم باراکی ل تورکیا گەلەک کەسان دژبەریا خوە ل هەمبەر وی دیار کرن و ئومید ئۆزداخ سەرۆکێ پارتا زەفەر دیار کر، ئەمریکا ب سالانە کار دکەت دا تورکیا لاواز بکەت، ل سووریێ ژی دیسان تورکیا هاتە خاپاندن، وان سۆز دانە تورکیا کو دی هەسەدێ هەلوەشینن، لێ تشتەک وەسا نەهاتە کرن و نها هەسەدە بهێزتر لێ هاتیە و ل سووریێ بوویە پشکەک ژ دەستهەلاتێ و دیارە ئەمریکا کار دکەت پشتی شەڕێ ئیرانێ ل تورکیا ژی ئالۆزیان دروست بکەت، داخویانیێن تۆم باراکی گەلەک مەترسیدارن و دیارە ئەمریکا کار بۆ لاوازکرنا تورکیا دکەت، دڤێت تۆم باراک ژ تورکیا بهێتە دەرخستن، هەکە ئاکپارتی ل هەمبەر داخویانیا تۆم باراکی بێدەنگ بیت ئەو یەک شەرمزاریەکا مەزنە بۆ تورکیا.
پارتا نەتەوەپەرست یا تورکیا ژی دوهی ب توندی بەرسڤا تۆم باراکی دا و دیار کر، دڤێت تۆم باراک وەکو بالیۆزێ ئەمریکا کارێ خوە بکەت، نابیت ب چو رەنگەکێ بالیۆزێ ئەمریکا دەستێوەردانێ د کاروبارێن ناڤخوەیی یێن تورکیا دا بکەت، تورکیا دشێت هەموو پرسێن خوە چارەسەر بکەت، هەلوەستێ باراکی د جهێ خوە دا نینە و دڤێت تۆم باراکی داخوازا لێبۆرینێ ل گەل و حوکمەتا تورکیا بکەت، چونکی داخویانیێن وەسا دێ بنە ئەگەرێ ئالۆزیێن زێدەتر و د دەمەکێ وەسا ئالۆز دا دێ پەیوەندیێن تورکیا و ئەمریکا خرابتر لێ هێن و گرنگە حوکمەتا تورکیا ژی ب توندی هۆشداریێ بدەتە تۆم باراکی و ئێدی رێ نەدەت جارەکا دی داخویانیێن وەسا بدەت.
ل ئالیێ دی گەلەک ژ ئەندامێن پەرلەمانێ تورکیا ژ چەندین پارتێن سیاسی یێن وی وەلاتی و هژمارەک زێدە ژ سیاسەتمەدارێن تورک ژی د داخویانیێن جودا جودا دا دژبەریا خوە ل هەمبەر داخویانیا بالیۆزێ ئەمریکا دیار کرن و راگەهاندن داخویانیا تۆم باراکی بزاڤەکە بۆ پارچەکرنا تورکیا و ئەو یەک ب چو رەنگەکێ ژی ناهێتە قەبوول کرن و دڤێت تۆم باراک ژ تورکیا بهێتە دەرخستن.
