ئەحمەد ئدریس: من خەونا خوە یا ٢٠ سالێن بۆری بجهئینا
تاهر رێكانی
كوڕێ باژێرێ دهۆكێ و یاریزانێ هه‌لبژارتیێ ئیراقێ یێ كیگبۆسینكێ ئه‌حمه‌د ئدریس پشكداری د قاره‌مانیا ماسته‌ر یا جیهانێ یا ڤەکری دا دكه‌ت، ئه‌وا ل وه‌لاتێ ئۆزپا‌كستانێ هاتیه رێكخستن و د كێشه‌یا كێمتر ژ 80 كگم دبیته ئێكه‌م یاریزانێ پارێزگه‌ها دهۆكێ د ڤێ قاره‌مانیێ دا و شیا ب میدالیا زێرێ بهێته خه‌لاتكرن و هه‌روه‌سان كچه‌ك ژ پارێزگه‌ها هه‌ولێرێ ب هه‌مان میدالی دهێته خه‌لاتكرن و دبنه قاره‌مانێن جیهانێ ب یاریا ناڤبری.
د داخۆیانیه‌كێ دا ئه‌حمه‌د ئیدریس یاریزانێ هه‌لبژارتیێ ئیراقێ دیار كر پشتی هه‌ڤركییه‌كا دژوار بەرانبەر حه‌فت یاریزانێن وه‌لاتێن پشكدار كری و د یاریا دووماهیێ دا كه‌فته به‌رامبه‌ر یاریزانێ هه‌لبژارتیێ ئۆزپا‌كستانێ وه‌كۆ مێڤاندارا قاره‌مانیێ و ئه‌ز شیام د ڤێ یاریێ دا سه‌ركه‌فتنه‌كا ب زه‌حمه‌ت بده‌ستخۆڤه بینم و خه‌ونا خۆ یا 20 سالان بجهبینم ئه‌وژی ڕێزا ئیكێ هاتم و بوو مه قاره‌مانێ جیهانێ.
ئه‌حمه‌دی دیاركر ژی كو ژ سه‌رجه‌مێ شەش میدالیێن زێرێ یێن هه‌لبژارتیێ ئیراقێ ئه‌ز و كچه‌كا هه‌ولێرێ بناڤێ بژان كاروان شیاین دو میدالییان بده‌ستخۆڤه بینین هه‌ر وه‌سان دیاركر كو هه‌لبژارتیێ ئیراقێ شه‌ش زێر و پێنج زیڤ و 20 برۆنز بده‌ستخۆڤه ئینان ل رێزا ده‌هێ لسه‌ر ئاستێ جیهانێ هاتن، د ڤێ قاره‌مانیێ دا 3500 یاریزانان ژ 55 وه‌لاتێن بهێز ب یاریا كیگبۆكسینكێ پشكداری تێدا كربوو.
