نێچیرڤـان بارزانـی و مـەسرور بارزانـی پیرۆزباهی ل هەمی ئیراقییان كر
قەیس وەیس:
ب شێوەیەكێ فەرمی هەلبژارتیێ ئیراقێ دەربازبوون مۆندیالا جیهانی 2026ێ، پشتی د یارییا ڤەبر یا پاشكۆ ب سەركەڤتی ل سەر هەلبژارتیێ بۆلیڤیا ب دو گۆلان بەرانبەر گۆلەكێ، د یارییا واندا ئەوا دوهی ل وەلاتێ مەكسیك هاتیە كرن، هەردو گۆلێن ئیراقێ ژلایێ یاریزانێن وێ ئەمیری ئەلعماری و ئەیمەن حسێن تۆماركرن.
ڤەگەڕیانا دیرۆكی پشتی 1986ێ
دەربازبوونا ئیراقێ بۆ مۆندیال دهێتە هژمارتن یا دیرۆكی پشتی ڤەقەتیانەكا درێژی بۆ 40 سالان كو ئێكەم جار ل مۆندیالا 1986ێ بوو ئەوا هەر ل وەلاتێ مەكسیك هاتیە كرن.
پیرۆزباهیێن سەرۆكێ حوكمەتێ و هەرێمێ
نێچیرڤان بارزانی سەرۆكێ هەرێما كوردستانێ و مەسرۆر بارزانی سەرۆكێ حوكمەتا هەرێما كوردستانێ پەیامێن پیرۆزباهیی ئاراستەیی گەلێ ئیراقێ و یاریزانان كرینە و نڤێسییە
نێچرڤان بارزانی: ب هەلگەڤتا سەركەڤتنا هەلبژارتیێ ئیراقێ و دەربازبوون بۆ مۆندیالا 2026ێ گەرمترین پیرۆزباهییا ل گەلێ ئیراقێ ب گشتی و وەرزشڤان و یاریزانێن هەلبژارتیێ دكەم، ئەڤ دەستكەڤتە دیرۆكی یە پشتی 40 سالێن چاڤەڕێبوونێ ب دەستكەفت، مزگینییا خۆش و جهێ شانازیێ یە بۆ هەمی ئیراقییان، دەستخوەشیێ ل هەمی ئەندامێن هەلبژارتیێ دكە مكو ب ماندیبوون و دلسۆزیا خوە خەونا گەهشتنا مۆندیالێ كرە ڕاستی، هیڤییا سەركەڤتنێن بەردەوام بۆ هەلبژارتیێ ئیراقێ د یاریێن گرۆپێ مۆندیالێ دا داخوازم و هیڤیدارم ئەڤ سەركەڤتنە ببیتە هیڤی فوتبۆل و خۆشی بۆ هەمی كەسان.
مەسرۆر بارزانی: پیرۆزباهیێ ل هەلبژارتیێ فوتبۆلا ئیراقێ دكەم ب هەلكەڤتا سەركەڤتن بەر ب مۆندیالا جیهانی 2026ێ، ب هیڤییا سەركەڤتنێ بۆ هەمی وەرزشڤانان و یاریزانێن هەلبژارتی دخوازم.
ئیراق د كیش كۆمێ دایە
بڕیارە هەڤڕكیێن مۆندیاالێ ل 11ێ خزیرانێ هەتا 19ێ تەمووزا بهێت ل هەرسێ وەلاتێن كەنەد، ئەمریكا و مەكسیك بهێنە ئەنجامدان، هەلبژارتیێ ئیراقێ د كۆما نەهێ دایە کو كۆمەكا بهێزە بەرانبەر هەلبژارتیێن فرەنسا، سنیگال و نەرویج.
یاریێن ئیراقێ
ئیراق – نەرۆیج 17- 6- 2026 یاریگەها جیلیت، ئەمریكا، دەمژمێر ئێكێ سپێدێ.
فرنسا – ئیراق، 23-6-2026 یاریگەها لینكۆلن، ئەمریكا، دەمژمێر 12ێ شەڤێ.
سنیگال – ئیراق، 26-6-2026، یاریگەها فێلد، ئەمریكا، دەمژمێر 10ی شەڤ.
