د پاراستنا وەلاتی و بەرژەوەندیێن خوە دا بێدەنگ نامینین
بالیۆزخانەیا ئەمریكا ل بەغدا هوشدارییەكا توند ددەتە حوكمەتا ئیراقێ و گەفێن دژوار ل گروپێن میلیشیا دكەت، كو ئێدی ل هەمبەر هێرشان بێدەنگ نامینن، هەڤدەم خەلاتەكێ چەند ملیۆن دۆلاری راگەهاندیە بۆ هەر كەسەكێ پێزانینێن هوور ل سەر گروپێن میلیشیا بدەت.
پەیڤدارێ بالیۆزخانەیا ئەمریكا ل بەغدا، بەیاننامەیەكا رۆژنامەڤانی بەلاڤكر و دیار كر، میلیشیایێن تیرۆرستی ل ئیراقێ ل شەڤا شەمبییا بۆری، ژ پێخەمەت تیرۆركرنا دیپلۆماتكارێن ئەمریكی، دوو هێرشێن مەترسیدار كرینە سەر دەزگەهێن دیپلۆماسی یێن ئەمریكا ل ئیراقێ.
هەروەسا ئاماژە ب وێ چەندێ ژی دا «ژ بلی ڤان هەردوو هێرشان، د چەند حەفتیێن دەربازبوویدا، گروپێن میلیشیا ژ ناڤخۆیا ئیراقێ و هەرێما كوردستانێ و ژ وەلاتێن جیرانێن ئیراقێ ژی، وەلاتیێن ئەمریكی و دەزگەهێن حوكمەتا ئیراقێ و خەلكێ سڤیل كرینە ئارمانج، كو د ناڤ هێرشان دا نوونەراتیێن مە یێن دیپلۆماسی ژی هاتینە ئارمانجكرن».
پەیڤدارێ بالیۆزخانەیا ئەمریكا ل بەغدا دوپات كر، كو چەندین جاران داخواز ژ حوكمەتا ئیراقێ كرینە ب زووترین دەم ئەركێ خۆ بجهبینیت بۆ راگرتنا هێرشان ل سەر دەزگەهێن ئەمریكا و رێگریێ ل میلیشیایێن تیرۆرستی بكەت، كو ئێدی ئاخا ئیراقێ بۆ هێرشكرنێ بكارنەئینن؛ هەڤدەم پەیڤداری هوشداری دا حوكمەتا فیدرال و گەف كر، هەكە حوكمەتا ئیراقێ پێگیر ب ئەرك و سۆزێن خۆ نەبیت، ئەمریكا ئێدی د پاراستنا وەلاتی و بەرژەوەندیێن خۆ دا بێدەنگ نامینیت.
هەروەسا خەلاتەكێ سێ ملیۆن دۆلاری راگەهاند بۆ هەر كەسەكێ پێزانینێن دروست ل سەر ئاشكراكرنا ناسنامە و جهێ گروپێن میلیشیایێن بەرپرس ژ ڤان هێرشێن دهێنە سەر ناڤەندێن دیپلۆماسی یێن ئەمریكا ل ئیراقێ، بدەت.
