گرۆپێن چەكدار ل نەینەوا بارەگەهێن خۆ چۆل دكەن و د ناڤ خەلكی دا بەلاڤ دبن
چاڤدێرەكێ سیاسی ل پارێزگەها نەینەوا راگەهاند؛ پشتی روودانێن 16ێ ئۆكتۆبەرا سالا2017ێ، گرووپێن چەكدار یێن هاتینە ناڤ باژێڕێ شنگال، زوممار، رەبیعە و تەلكێفێ هەتا دگەهیتە كەركووكێ و دەڤەرێن ماددەیێ 140، چەندین بارەگەهێن سەربازی و سیاسی د ناڤ تاخێن ئاكنجیبوونێ دا ڤەكرینە، كو د نوكە دا بووینە مەترسییەكا راستەقینە ل سەر ژیانا خەلكێ سڤیل ل هەموو دەڤەران.
حەسەن خەلو، چاڤدێرێ سیاسی گۆت: «ئەڤ رەوشە بوویە ئەگەرێ دروستبوونا ترسێ ل دەف خەلكێ سڤیل، ب تایبەت ئەو مالێن دكەڤنە نێزیكی وان بارەگەهان، چونكو بەردەوام مەترسییا هندێ هەیە ژ ئالیێ فڕۆكەیێن ئەمریكا ڤە بهێنە بۆردۆمانكرن.»
ناڤهاتی دیار كر ژی كو هەبوونا بنگەهـ و بارەگەهێن سەربازی یێن حەشدا شەعبی ل ناڤ دەڤەرێن كوردستانی یێن ماددەیێ 140، ژیانا خەلكێ مە ئێخستییە د مەترسییەكا مەزن دا، چونكو بەردەوام دهێنە ئارمانجكرن و ئەڤێ چەندێ دلگرانییەكا مەزن ل دەف وەلاتییان پەیدا كرییە.
زێدەتر گۆت: «خەلكێ مە بەردەوام داخوازێ دكەن ئەو بارەگەهـ بۆ دەرڤەی باژێڕان و دوور ژ جهێن ئاكنجیبوونا خەلكێ سڤیل بهێنە ڤەگوهاستن، دا كو گیانێ وەلاتییان یێ پاراستی بیت.»
حەسەن خەلو تەكەز كر كو ل هندەك دەڤەران گرووپێن چەكدار بارەگەهێن خۆ چۆلكرینە و د ناڤ جهێن ئاكنجیبوونا خەلكێ دا بەلاڤ بووینە، داكو ئەگەر هاتنە بۆردۆمانكرن، خەلكێ سڤیل ببیتە قوربانی و ب ڤێ یەكێ فڕۆكەیێن ئەمریكا تۆهمەتبار بكەن.
ل دووماهییێ بەرچاڤ كر كو ل رۆژئاڤایێ دیجلە و چەندین دەڤەرێن دی، بارەگەهێن گرووپێن چەكدار بووینە ئارمانج، لەوما پێدڤییە ئەڤ گرووپە خۆ ژ ناڤ خەلكێ مەدەنی دوور بێخن و رێ نەهێتە دان ئیراق ببیتە مەیدانا شەڕێ دەولەتان.
