ئارامييا خێزانێ د دهمێ قهيرانێن ئابۆری دا
سينهم چێى
د ئهڤان سالێن دووماهيێ دا بارێ ئابۆرى ل سهرانسهرى جيهانێ و ب تايبهتى ل كوردستانێ يێ جێگير نينه و بوويه ئهگهر فشارهكا زۆر ل سهر خێزانێ ب گشتى و سهرۆكێ خێزانێ ب تايبهتى دروست ببيت. گرانبوونا بهايێ ههر تشتهكى و كێمبوونا دهرفهتێن كارى ب تنێ ئاريشهكا دارايى نينه، بهلكو ئاريشهيێن دهروونى و جڤاكى يێن مهزنن كو راستهوخۆ كاريگهرى ل سهر ئارامييا خێزانێ ههيه. گهلهك جاران ئهو ئاريشهيێن دبنه ئهگهرێ ژێكجودابوونێ يان تۆندوتيژيێ، بنياتێ وان بۆ نهبوونا پلانهكا دارايى و لێبۆرينا دناڤبهرا ههڤژيناندا دزڤريت.
ئەڤجا بۆ هندێ خێزان ب سلامهتى ژ ئهڤان قهيرانان دهرباس ببيت، پێدڤييه ههڤژين ل سهر بنهمايێ “ههڤپشكيا راستهقينه“ كار بكهن. پێدڤيه راستگۆيى و شهفافيهت دناڤبهرا ئهواندا ههبيت، پێدڤيه دايك و باب پێكڤه روينن و بزانن چهند داهات ههيه و چهند پێدڤيێن سهرهكى ههنه بۆ هندێ بزانن مهزاختيێن وان ژى دێ چهند بن. ڤهشارتنا كێشهيێن دارايی یێن خێزانێ ژ ئێكودو ب تنێ گۆمان و دلگرانيێ ل دويڤ خۆ دئينيت. دبيت گهلهك كهس هزر بكهن بابهتێ ههڤپشكيا راستهقينه، شهفافيهت، راستگۆيى ب تنێ د رێڤهبرنا كارگيريدا دگرنگن، لێ د خێزانێ ژيدا ئهڤ چهنده گهلهك دگرنگن. ژلايهكێ ديڤه پێدڤيه د خێزانێ دا كهلتۆرێ رێزبهنديێ ههبيت، واته جوداكرنا پێدڤيێن سهرهكى(خوارن، ساخلهمى، پهروهرده…هتد) ژ يێن نهسهرهكى يێن كو ب تنێ بۆ كهيفخۆشيێنه و مرۆڤ دشێت دهستان ژێ بهردهت.ئهڤه ب وێ رامانێ ناهێت كو ئهڤ كهسه قهلسن، بهلكو وێ چهندێ دگههينيت كو ئهڤ كهسه د شارهزا و هشيارن د پاره مهزاختنێ دا بۆ هندێ تووشى قهرێن زۆر نهبین.
خالا دى يا گرنگ د ئهڤێ رهوشێدا پاراستنا ئارامييا دهروونێ ئهندامێن خێزانێيه و رێزگرتنا ل ههڤدوويه، نابيت ژن و زهلام ههر ئێك ژلايێ خۆڤه يێ دى تاوانبار و كێم خهم ل قهلهم بدهت. پێدڤيه ههموو لايهك بزانن پاره دهێت و دچيت، لێ ئهو خێزانێن ل دهمێ تهنگاڤياندا پشتگيرييا ئێكودو دكهن، ل دهمێ رهوشێن ئاسایی و خۆش ژى دێ خێزانهك بهێزتر بيت و ل دهمێ تهنگاڤيان چ تشت نهشێن بنياتێ وێ بههژينيت.
