شهڕ و ئالۆزی كاریگهریێ لسهر پهيوهنديێن جڤاكى دكهن
ههولێر، قائید میرۆ:
دهروونناسەکی د دیدارەکێ دا بۆ ڕۆژنامەیا ئەڤرۆ دیار کر کو ههبونا شهڕ و ئالۆزیان كاریگەریەکا راستهوخۆ لسهر دهروونێ مرۆڤی ههیه و گۆت؛ لێ پێدڤیه مرۆڤ كۆنتڕۆلا خوه بكهت و نهكهڤیته بن كاریگهریا نه سهقامگیریێ.
دەروونناس تهنیا بهدرهدین، دیار كر، شهڕ كاریگهریێن خراب لسهر دهروونێ وهلاتیان پهیدا دكهت و گۆت؛ دژوارترین گڤاشتنا دهروونی كو كاریگهریەکا راستهوخۆ و دۆم درێژ لسهر مهژیێ مرۆڤی ههبیت ئهو دهمە یێ تاك ههست دكهت دناڤا ژینگهههكا مهترسیداردا دژیت.
دەروونناسی د بەردەوامیا ئاخفتنێن خۆدا دیار کر کو ههردهمێ مرۆڤی ههست ب ترسێ كر و رهوش یا تهنا نهبیت هندهك پشكێن مهژیێ مرۆڤی یێن گرێدایی ترسێ چالاكتر لێدهێن، یانژی هندهك بڕیار ههنه ل دهمێ شهڕ و ئالۆزیان مرۆڤ نهشێت بدهت و گۆت؛ چونكه ههبونا ترسێ و رهوشا نه سهقامگیر كاریگهریێ پهیدا دكهت و بیردانكا مرۆڤی یا ئاسایی نینه.
تەنیا دیار کر ژی، مرۆڤێن دناڤا شهڕی دا دژین بهردهوام هندهك حالهتێن دهروونی تووشی وان دبن، ژبەرکو ترس ههیه روودان دوباره ببن و كاریگهری ل خهوا مرۆڤی دبیت، چونكه مرۆڤ هزر دكهت دێ كارهسات پهیدا بن و دهمێ پهیدابوونا ئهڤێ كارهساتێ ژی دیار نینه و گۆت؛ لەوما خهو گهلهك یا گرنگه دهمێ ههبوونا شهڕ و ئالۆزیان دڤێت مرۆڤ دهمێ خوه یێ خهوێ نهگۆهۆڕیت، چونكه كێم خهویێ كاریگهریێن نهرێنی لسهر هزرا مرۆڤی هەنە.
تهنیا بهدرهدین ئەو چەندە ژی دیار کر کو ئهگهر شهڕ یێ بهردهوام بیت ژبەر ترسێ مرۆڤ ناخوازیت دهركهڤیت و تێكهلی جڤاكی ببیت و گۆت؛ ل گورهی ئەو ڤهكۆلینێن هاتینه كرن پتریا كهسێن ناڤا شهڕی ژیاین پهیوهندیێن جڤاکی پهیدا نهكرینه، یانژی نهشیاینه لسهر پهیوهندیێن خۆ یێن جڤاکی بهردهوام بن.
دەروونناسی دا زانین کو باشترین تشت د دهمێ شهڕ و ئالۆزیان دا ئهوە مرۆڤ كۆنتڕۆلا خوه ژدهست نهدهت، یان دهمێ مرۆڤی ههست بڤێ چهندێ كر رهوشا ئالۆز كاریگهریێن خراب پهیداكرینه و بێ هیڤی كریه و ترس و گڤاشتن ههنه لسهر دهروونێ مرۆڤی، پێدڤیە مرۆڤ بخۆ هاریکاریا خۆ بکەت بۆ دهربازكرنا رهوشا خۆ یا دهروونی و گۆت؛ ئهگهر نهشیا ژی دشێت سهرهدانا بسپۆرهكێ دهروونی بكهت بۆ وەرگرتنا چارەسەریێ.
دەروونناس تەنیا بەدرەدین دیار کر ژی، مخابن كهنالێن راگههاندنێ رۆلهكێ خراب ههیه و دڤێت وهلاتی د هشیار بن ل دهمێ شهڕ و ئالۆزیان ب نووچه و زانیاریێن هندهك دهزگههێن راگههاندنێ نههێته خاپاندن و گۆت؛ ژبهركو رهنگه بۆ پهیداكرنا بینهر و خوینهرێن خوه شێوازێ ڤهگوهاستنا زانیاریان زێدهگاڤی تێدا بهێتهكرن و كاریگهریێ بكهته سهر مهژیێ وان.
