جەڤەنگا شەڤێ
سەگڤان ئیسماعیل
شەڤێ چەنگێن خوە داهێلان بەر ب سەرانسەری پاژێری ڤە برن، ڕەنگێ خوە یێ ڕەشگرتی هەمی کوژیێن باژێری داگیرکرن و هەمی ڕێک لێ گرتن، هەمی پێکۆلکرن بۆ ڕزگاربوونا ژ ئەژدەهایێ شەڤێ بێ ئارمانج و ئەنجام بوو، هەروەسا پێکۆلا هەبوونا ژیانا ئاسان هەمی هاتە قەدەغەکرن و ب گۆمانڤە هاتنە چەسپاندن د خەیالا هندابووی دا. بۆ جارا داوییێ گەهشتە ستێرا بێ ڕۆناهی، هەلبەت ئەڤێ چەندێ ئارامییا دلێ بێ هیڤی پتر بەر ب بەرتەنگییا ئالۆزییاڤە بر هەتا گەهشتییە داوییا هەناسەییا شەڤێ.
بێدەنگی هەر وەکی خوە ما، ڕەوش چ گۆهۆرین لێ نەهاتنەکرن بتنێ شەپرزەی هەبوونا خوە زالکربوو… ل سەر هەمی هەستنا هیڤییا بەلگێن خوە هەمی وەشاندن، ئەڤێ شەڤێ ڕەنگێن ستێران ژی گۆهارت بەرەڤ ڕەنگێن بێهۆدەییێ ڤە برن. ئەو ڕەنگڤەدانا گەنجاتییا ئەوان ستێرێن ڕەنگێ گەش نەمان، وەکی بەرێ هەبوونا خوە بەرزەکرن، هەمییان دەنگێ شینییێ لێ د باری، د بوو کولمێن خوەلییێ لێ دبارین، جەڤەنگا شەڤێ د تاریتییا خوە دا دەهمەنا خوەیا سپی د دەستدا هەروەکی (پارسیەک)ێ لێ هات، هەمی سنوورێن ئارامییێ هندادکر، قێژیێن گۆمانکری د گەهشتنە بەر پەرێن ئاسمانی، ئەو ڕەنگێ د دەستیدا ب شێوەیەکێ نهێنی بەردا بەر ئاڤێدا د ناڤا شێلاتییا ئاڤا تاڤییا بهارێ دا تێکەلی ھەڤبوون و دگەل ئاخسۆرکێ نهێنییا خوە پاراست، شەرمینییا خوە دگەل پستپستا جڤاکێ خوە دا بێدەنگ کر، سپێدەهییا خوە سەر ڕاستکر هەروەکی فریشتەیەکێ لاڤبوو کری، چەنگێ خوەیێ شکەستی دانا بەر خوە؛ هێدی هێدی بەر ب لیسا خوەڤە یا جاران چوو، ژ بەر کارێ خوەیێ بەرێ نینۆكێن خوە هەمی بڕین و بسک ڕەنگدا ب ڕەنگێ … ، ژ بوو دوبارەکرنا بیرهاتنا شەڤا خوەیا بەرێ، پێکۆلکرن دو بارە بگەهیتە نەستا خوەیا بەرزە…، لێ ئەڤێ جارێ شەڤێ ب خوە ئەو نە حەواند و ئازاردا، شەڤێ هەر وەکی بەرێ و ب ڕەنگێ خوەیێ نهێنی هێدی هێدی کارێ خەوڕابوونێ دکر.
ژ نیشەکەکێڤە.. شەڤێ ب هەمی هەبوونا خوەیا کەربگرتی و تاریگرتیڤە دەنگێ خوە لێ بادا و بلندکر و گۆتێ: ئەز هەلگرێ نهێنییا تەمە، لێ تو ب خوە نەهەلگرا نهێنییا خوەی هندەک جاران ژ ڕەنگڤەدانا نهێنییا ڕەنگێ ڕەش ژی بترسە، دبیت ستێر ژی نهێنییا نە پارێزن. ئەڤ چەندە بوو ئەگەرێ هندێ جەڤەنگا شەڤێ دوبارە هزرا خوە بکەت؛ ئێکسەر چەپ بدەت چەوتییا خوە یا جاران دوبارە نەکەت، هەمی نهێنییا د دلێ خوە دا کۆتان بکەت، لێ جار بۆ جاران بیرهاتنا شەڤا ڕەش دگەل ڕوبارێ بهارێ تێکەل بکەت و ڕۆندکان برێژیت بۆ ستێرێن زیزبووی د چارچۆڤەیێ خەیالا جەڤەنگا شەڤێ ب زیندی ب مینیت، هەر وەکی خەیالا سێربەندێ؛ دا بتنێ ب ڤەشارتی بمینیت.
