شـەڕێ ب وەكـالـەت
خالد ئەحمد بادی
پشكا دویێ
ب مۆشەك و درۆن و تۆپ و فرۆكان كو شەڕێ چەكێ گران و پاشان ل لیدانا ئیكێ زیانێن مەزن ئەمریكا و ئیسرائل گەهاندنە ئیرانێ و ب سەدان سەركردە و وەزیر و بەرپرس و قیادا ئیرانێ كوشتن و ژ وان خامەنەئی (مرشد الاعلی) و پاشی عەلی لاریجانی. بێگومان ئیرانێ ژی بەرسڤێن مەزن بەرانبەر وان هەبوون ب مۆشەك و درۆن و رۆكێتان، هەروەسا ب تۆپ و فرۆكەیان و ئیرانێ هێرش كرنە سەر وەلاتێن كو بنگەهێن ئەمریكا لێ مینا ئیمارات و قەتەر و دوبەیی و بەحرین و ئوردن و سعوودیە و كویت و ئیراق و هەرێما كوردستانێ و هەر جهەكێ ئیرانێ گومان هەبایە، ئێكسەر بومبەباران دكر ب هەمی جۆرێن چەكێن دویر هاڤێژ و ب رێكا فرۆكە وگەمییان یانژی ب رێكا كۆم و گرۆپێن سەر رێ دا چووین وەكی حزب اللە و (سرایا السلام) و حەشدا شەعبی و زۆر گرۆپێن دی یێن چەكدار ل دەڤەرێ و ب تایبەت دەڤەرا رۆژهەلاتا ناڤین و ئیران شییا زیانێن مەزن و بەرچاڤ بگەهینتە بەرژەوەندیێن ئەمریكا ل دەڤەرا رۆژهەلاتا ناڤەراست, لێ ل ڤێرە ئەڤ پرسە هندەك بەرسڤ و پرسیار و هزرێن دی ل دەڤ مە هەمییان پەیدا دكەت و دێ یا دروست و راست د هزركرنا هەر تاكەكی یان كەسەكی یان نڤێسەرەك و شرۆڤەكارەكی دا نەبوو كو دێ ئیران شێت ب ڤی رەنگی و ڤی ماوەیێ درێژ بەرگری و بەرخۆدانێ كەت, ئەڤە ڤێ راستیێ بۆ مە دیاردكەت كو ل ڤی شەڕی دا ئانكو د ڤی جەنگێ هەر سێ ئەلیفان دا ئیران، ئەمریكا، ئسرائیل و هندەك لایەن و هێزێن دی دیاربووینە و ب شێوەكێ نهێنی یێ پشتەڤانییا ئیرانێ دكەن و راستە ئیران ب ژیێ خۆ یێ درێژ كو هەر ژ سالا (1979) دەمێ شاه رۆخاندی و خۆدانێن عەمامان؛ دەستهەلات وەرگرتی ب تنێ یێ كار ل سەر سێ خالێن سەرەكی دكەن، ئانكو سێ پرسان دكەن كو پرسا ئێكێ و یا ژ هەمییان گرنگتر پرسا شویشتنا مێشكی (غسل الدماغ) و ب تنێ یێ مێشكێ وەلاتیێن ئیرانی ب پرسێن مەزهەبیەت و شیعەكرنێ تژی دكەن و بتنێ شیعاتیێ دكەنە د مێشكێ ئیرانییان دا. پرسا دویێ كو كار ل سەر كری هێز و جۆرێن چەك و مۆشەك و چەكێ ئەتۆمی كو ئیرانێ هەمی هێزا خۆ كریە د پرسێن چەكی دا و ئیرانی یێن گەهشتینە وی رادەیی كو نێزیكە دێ چەكێ ناڤۆكی (ئەتۆمی) بدەستڤەئینن. پرسا دی ئەوە پرسێن پێشەسازی و بازرگانی و ئابووری زۆر كار ل سەر كری یە و هەتا كو گەهشتیە وی رادەیی كو ئیران یا هەمی كەلوپەل و دەزگەهێن جودا جودا دروست دكەت و پێشەسازی بەرفرەهكری یە و قەبارەیێ پێشەسازی و بازگانیێ بەرفرەهكریە. لەوما ل ڤێرە بۆ مە دیاردبیت كو ئیرانێ زۆر ل سەر ڤان هەر سێ خالێن ل سەری كار كرییە، لێ ئەڤە وێ چەندێ ناگەهینیت كو ئیران بشێت بەرسڤان ئیسرائیل و ئەمریكا بدەت و د ڤی ماوێ درێژ دا و بۆ مە دیاردبیت كو ئیران یا سیناریۆیا سالێن كەڤن و وەلاتێن مە باس لێ كرین كو ئیران یا شەڕێ ب وەكالەت دكەت ل دەڤەرێ بۆ چین و بۆ رۆسیا و ژبۆ وێ چەندێ یە كو ڤاڤارتنێن خۆ هەردو وەلاتێن ناڤئینایی ل گەل ئەمریكا ئەنجام بدەت, ئەڤە هەمی بۆ پاراستنا بەرژەوەندیێن بلند یێن خۆ ل دەڤەرێ دزڤریت و ئەمریكا ب تنێ ئاستەنگە د رێیا هەردو وەلاتێن مە ناڤ لێ ئینایی كو شەڕ و جەنگێن وان یێن وەلاتێن زلهێز ب درێژاهییا دیرۆكێ د بەردەوامن و هەردو لایەن یێن بەرانبەر هەڤدو؛ جەنگی دكەن لێ ب شێوەكێ نهێنی كو ل دوماهیێ دێ بێژین كو جەنگ و شەڕ د بەرژەوەندیا چ لایەكی دا نینن و ب تنێ دێ ب رێكێن ئاشتی و ئێمناهیێ هەر تاكەك و كۆمەك و وەلاتەك ب مافێن خۆ شاد بن.
