نێچیرڤان بارزانی و ئیراقچی رەوشا دەڤەرێ گەنگەشە دكەن
نێچیرڤان بارزانی، سەرۆكێ هەرێما كوردستانێ و عەباس عێراقچی، وەزیرێ دەرڤە یێ ئیرانێ ب تەلەفۆنێ ئاخفتن. سەرۆكاتییا هەرێما كوردستانێ دبێژیت: هەردوو ئالییان دوپاتی ل سەر گرنگییا پاراستنا تەناهی و ئارامیێ و بجهئینانا ئاشتیێ د دەڤەرێ دا كر.
سەرۆكاتییا هەرێما كوردستانێ د بەیاننامەیەكێ دا ئاماژە ب وێ چەندێ دا: د پەیوەندییەكێ دا، هەردوو ئالییان بیروبۆچوونێن خۆ دەربارەی دووماهی پێشهاتێن رەوشا دەڤەرێ گۆهۆڕین، هەروەسا دوپاتی ل سەر گرنگییا پاراستنا تەناهی و ئارامیێ و بجهئینانا ئاشتیێ د دەڤەرێ دا كر.
باس ل وێ چەندێ ژی هاتییە كرن: پەیوەندییێن كۆمارا ئیسلامییا ئیرانێ ل گەل ئیراقێ و هەرێما كوردستانێ و چەند پرسێن جهێ گرنگییا هەردوو ئالییان، تەوەرەكێ دی یێ پەیوەندییا وان یا تەلەفۆنی بوو.
د دەمێ دوو مەهێن دەربازبووی دا، نێچیرڤان بارزانی و عەباس ئیراقچی چەند جاران ئاخفتینە و پرسا شەڕێ د ناڤبەرا ئەمریكا و ئیسرائیلێ ل گەل ئیرانێ و چارەسەركرنا قەیرانان د بەراهییا گەنگەشەیێن وان دا بوویە.
