ڕاستییا کێمبوونا پاترییا ئایفۆنێ پشتی ئاپدهیتێن كۆمپانیێ
د گەل ڕاگەهاندنا هەر سیستەمەکێ نوو یێ ئایفۆنێ (iOS) ژ لایێ کۆمپانیا ئەپل ڤە، جیهان دکەڤیتە د ناڤ قەرەبالغی یەکا مەزن و دژی ئێک دا ژ لایەکی ڤە مۆبایل نوو بوویە و تایبەتمەندیێن سەرنجڕاکێشتر وەرگرتینە، لێ ژ لایێ دی ڤە، دەنگێ گازندێن بکارئێنەران ل سەرانسەری جیهانێ و جڤاکێ مە یێ ناڤخۆیی بلند دبیت کو ب تووڕەیی دبێژن: پشتی من مۆبایلا خۆ ئاپدهیت کری، شەحنا پاتریێ زووتر دهێتە خوار و ڕێژەیا ساخلەمییا وێ (Battery Health) كێم بوویه!. ئەرێ ئەڤ چەندە پلانەکا کۆمپانیایێ یە بۆ کڕینا مۆبایلێن نوو، یان کێشەیەکا زانستی و تەکنیکی یە کو پێدڤی ب هشیاریێ هەیە؟
ڕاستییا زانستی دیار دکەت کو كێمبوونا پاتریێ د چەند ڕۆژێن ئێکێ یێن پشتی ئاپدهیتێ دا، تشتەکێ سروشتی یە و پێدڤی ب ترسێ نینە. دەمێ سیستەم دهێتە گوهڕین مێشکێ مۆبایلێ دکەڤیتە د بن کارەکێ گران دا دبێژنێ (Background Indexing). مۆبایل نەچارە ب ملیۆنان داتا، وێنە و نامەیان دوبارە پۆلین بکەت دا کو د گەل قانوونێن نوو بگونجیت ئەڤ پرۆسێسە ژی ووزەیەکا مەزن دکێشیت.
دا کو بکارئێنەر تووشی ژدەست دانا زانیاریان و ژکارکەفتنا مۆبایلێ نەبیت، پێدڤی یە بەری دەستپێکرنا پرۆسێ هشیاری چەند خالا ببیت:
ئێک: ژ هەموو تشتێ گرنگتر چێکرنا کۆپیا پشتەڤانیێ (Backup)ە ب ڕێیا iCloud دا کو ههكه سیستەم ڕاوەستا، تشت بەرزە نەبن.
دو: پاتری پێدڤی یە د سەر ٥٠٪ێ دا بیت یان مۆبایل د شەحنێ دا بیت.
سێ: بکارئینانا هێلەکا وای فای (Wi-Fi) یا بنهجهـ، چونکو داتایێن مۆبایلێ ئەگەرێ سەرەکی یێ تێکچوونا داونلۆدێ نە.
خالەکا دی یا گرنگ ئەوە کو د چەند ڕۆژێن ئێکێ یێن دەرکەفتنا سیستەمێ نوو دا بکارئینەر لەزێ نەکەن. باشترە مۆبایل کێمەکێ حەفتیەک یان دو حەفتیان ل سەر سیستەمێ کەڤن بمینیت، ههتا کۆمپانیا ئەپل ئاپدهیتێن چاکسازیێ (Bugs Fixes) بکەت، پاشی پرۆسێسا نووکرنێ بهێتە کرن.
