دڤێت بەغدا سنۆرەكێ بۆ دەستهەلاتا گرۆپێن چەكدار ل دەڤەرێن كریستیانان دانیت و مافێن وان یێن دەستووری مسۆگەر بكەت
راپۆرتەكا مالپەرێ «نیو ئاراب» یێ بریتانی ئاشكەرا دكەت، سەركردەیێن ئایینی و سیاسی یێن كریستیانێن ئیراقێ داخاز ژ حوكمەتێ كرینە كو هەڤپشكییا سیاسی بۆ وان مسۆگەر بكەت، ئاسایشا دەڤەرێن وان بهێز بكەت و پشتەڤانییا ڤەگەڕیانا ئاوارەیان بكەت. چالاكڤانێن كریستیان ژی داخازا سنۆركرنا دەستێوەردانا گرۆپێن چەكدار د كاروبارێن ئابۆری و دەڤەرێن وان دا كرینە، ب تایبەت ل دەڤەرا دەشتا نەینەوا. هەروەسا داخاز كرینە دەنگدان ل سەر كورسیێن كۆتایا كریستیانان تنێ بۆ كریستیانان بیت دا نوونەرایەتییا راستەقینە یا ڤی پێكهاتەیی هەبیت و سەقایەكێ ئارام بۆ ڤەگەڕیانا خێزانان بهێتە دابینكرن.
ئەڤ داخازكارییە پشتی وێ چەندێ هاتینە كو عەلی ئەلزەیدی ل 14 گولانێ ب سەرۆك وەزیرێن ئیراقێ هاتییە دەستنیشانكرن. راپۆرت دیار دكەت كو ئەڤ داخازە نیشانا كێمبوونا باوەریێ و زێدەبوونا دلگرانیانە د ناڤ كەسایەتیێن كریستیان دا، كو پێشڤەچوونا پاشەڕۆژا كریستیانان ل ئیراقێ گرێدای ب سەروەرییا یاسایێ و پاراستنا وەلاتییان و سنۆركرنا دەستهەلاتا گرۆپێن چەكدار دبینن.
هەژمارا كریستیانان ل ئیراقێ د 20 سالێن بۆری دا ب شێوەیەكێ بەرچاڤ كێم بوویە، ژ ئێك ملیۆن و 500 هزار كەسان بەری سالا 2003 بۆ كێمتر ژ 200 هزار كەسان ل نها. پاتریاركێ كەنیسەیا كلدانی ل ئیراقێ و جیهانێ، مار پۆلسێ سێیێ نوونا، راگەهاند كو كریستیان گەلەك ب سەدەمێ تیرۆر و شەڕان و ئاوارەبوونێ هاتینە ئازاركرن، و داخازا ڤەگەڕیانا خێزانان كر.
ژ ئالییەكێ دی ڤە، ئانو جەوهەر عەبدۆكا، سكرتێرێ گشتی یێ هەڤپەیمانییا كریستیانێن ئیراقێ، داخاز ژ ئەلزەیدی كر پێنگاڤێن ئێكلاكەر بۆ رزگاركرنا كریستیانان ژ دەستێ گرۆپێن چەكدار و ئۆفیسێن ئابۆری یێن گەندەل بكەت، و داخازا هەڤپشكۆیا نشتیمانی یا راستەقینە كر.
یوسف یاقۆ، سیاسەتمەدارەكێ كریستیان ژ دەشتا نەینەوا، گۆت: «داخازێن مە نە ئیمتیازاتێن تایبەتن، بەلكو مسۆگەركرنا مافێن دستووری یێن بنەڕەتی و پاراستنا مە یە. حوكمەتێن بۆری نەشیایینە ئاسایشا دەڤەرێن كریستیانان ب پارێزن یان چارەسەرییا دەست ب سەردادەستەسەركرنا ئەرد و خانییان بكەن».
چالاكڤان بەشیر یەعقوب ژی دا دیاركر كو گەلەك خێزان هێشتا ژ بەر دەستهەلاتا گرۆپێن چەكدار دلگرانن، ودڤێت حوكمەت پێنگاڤێن جدی بۆ ڤەگەڕیانا باوەریێ ب دەولەتێ و بهێزكرنا پشكدارییا سیاسی یا كریستیانان بهاڤێژیت.
ئەڤ پێكهاتەیە پشتی سالا 2014 و هاتنا داعشێ تووشی ئاوارەبوونەكا مەزن بوون، و سەرەڕای ئازادكرنا دەڤەرێن وان، هێشتا ئاریشەیێن وەكی ئاڤەدانكرنێ، ڤەگەڕیانا مولكان و چارەسەركرنا زێدەگاڤییان ل سەر ئەردێن كریستیانان وەك ئاستەنگ ل هەمبەری ڤەگەڕیانا وان ماینە.
