بەغدایێ ژڤانێ دوماهیێ یێ رادەستكرنا چەكێ گرۆپان ئاشكراكر
پەیڤدارێ حوكمەتا ئیراقێ ژڤانێ ڤەكێشانا هێزێن هەڤپەیمانان و رادەستكرنا چەكێ گرۆپان ئاشكرا كر.
حەیدەر عەبوودی، پەیڤدارێ حوكمەتا ئیراقێ د كۆنفرانسەكێ رۆژنامەڤانی دا راگەهاند، عەلی ئەلزەیدی، سەرۆك وەزیرێن ئیراقێ رێنما داینە وەزارەتا دارایێ بۆ دروستكرنا هەژمارەكا تایبەت ب مەرەما دانانا وان پارەیێن د كەیسێن زەنگینبوونا نایاسایی و گەندەلیێ دا هاتینە ڤەگەراندن.
ئاماژە ب وێ چەندێ ژی كر، حوكمەت بەردەوامە ل سەر بجهئینانا ئەركێن خۆ یێن دەستووری بۆ پاراستنا سامانێ گشتی و بهێزكرنا دەزگەهێن دەولەتێ بۆ راپەراندنا ئەركێن وان.
عەبوودی باس ل وێ چەندێ ژی كر، بۆچوونا نها یا حوكمەتێ بۆ رووبڕووبوونا گەندەلیێ نە وەك قۆناغێن بەرێ یە، ژبەركو پاراستنا سامانێ گشتی بەرپرسیارەتییەكا مەزنە و دبن كارتێكرنا كەسان یان بارودۆخان دا نینە، بەلكو حوكمەت ستراتیژییەكا گشتگیر بۆ چاكسازییا دەزگەهی و رێڤەبرنا قەیرانان پەیڕەو دكەت.
د پشكەكا دی یا ئاخڤتنێن خوە دا، حەیدەر عەبوودی تەكەز ل سەر پرسا ئەمنی و سەربازییا وەلاتی كر و راگەهاند، دوماهییا مەها ئیلۆنا بهێت ژڤانێ دوماهیێ یە بۆ رادەستكرنا چەكی ب دەولەتێ، د هەمان دەم دا هێزێن هەڤپەیمانییا نیڤدەولەتی ژ ئیراقێ دێ ڤەكێشن.
