داستانا بارزانییان و قوربانیدانا بێ سنوور بۆ ئاخا كوردستانێ
یوسرا دێوالی محەمەد تاهر
هەمی مێژوو ب دەستپێك و داوییان ناهێنە نڤیسین؛ هندەك چیرۆك هەنە كو تەنها ب خوینێ، ب هەسترێن دایكێن جەرگسۆتی و ب دلەكی پڕی ژان ل سەر لاپەڕێن دلێ ئاخێ نەخشە دبن. دەما ئەم ناڤێ بارزان دئینن زمان، ئەم نەتنێ باس ل دەڤەرەكا جوگرافی دكەین، بەلكو باس ل سیمبۆلەكا نەمرا خۆڕاگریێ، باس ل قەلایەكا پۆلاینی دكەین كو دژوارترین سەدەمێن ستەمێ ل بەر خۆ دان و چ جاران سەدەم نەدا ل بێهنا ئالایێ پیرۆز یێ كوردستانێ. لێ ل پشت ڤێ سەربلندییا مەزن، چیرۆكەكا پڕی مەترسی، دڕنداتی و قوربانیبدانا بێسنوور هەیە؛ ئەڤجا دەما مرۆڤ بەرێ خۆ ددەتە تاوانا ئەنفالكرنا بارزانییان، وەك ئەو ڕۆژا ڕەش یا ٣١ی تیرمەها ١٩٨٣ێ، مرۆڤ دبینێت كو چەندە بژارە و مێرخواسێن ڤی وەلاتی ب باجەكا گران ئەڤ ئاخە پاراست.
د دەستپێكا تاریاتیێ دا؛ كاتا بیابان ببوونە گۆڕستان
بێگومان، مێژوویا مرۆڤایەتیێ كێم تاوانێن وەكی ئەنفالكرنا بارزانییان دبینێت؛ كا چاوا ڕژێما بەعسیا گۆڕبەگۆڕ ب پلانیەكا پێشوەخت و ب بڕیارەكا قێزون، هەشت هەزار مێر، زەلام، گەنج و نەخاسمە پیرەمێر و زارۆیێن مێرمنداڵ (ژ تەمەنێ نەهـ سالیێ هەتا نەوەد سالیێ) ژ جڤاكێن ستەملی یێن هەولێرێ ڕەفتاندن و بەر ب بیابانێن ڕووت و بێسەروشوێن یێن ژێریا ئیراقێ برن.
بێی كو چ دادگەهـ یا تاوانباركرنەك هەبن، ئەڤ هەشت هەزار مێرخاسە ب زیندەیی د گۆڕێن ب كۆم دا هاتنە ڤەشارتن. ئارمانجا ڕژێمێ یا سەرەكی ئەو بوو كو دەمارێ نەتەوەیی و خەباتا ڤی دەڤەری ببڕێت و های لێ بكەت كو ناڤێ «بارزان» بۆ هەردەم بێدەنگ بیت. ڕژێمێ دزانی كو هەتا ئەڤ مێرە ل سەر پێیان بن و پشتەڤانێن شۆڕشێ بن، خەونا ژناڤبرنا ناسنامەیا كوردی تنێ خەونەكا خاڤە، لەوما لێدانا وان، لێدانەك بوو ل هەناڤێ هەستیارێ شۆڕشگێریێ ل كوردستانێ.
شۆڕشا دایكان؛ دەما باران و ژان بووینە ئێك لێ ئەڤ تاوانا مەزن، نەشییا ئاگرێ باوەرییا دایك، خووشك و هەوسەرێن بارزانییان بكوژیت. ئەڤ خانمانە، پاشی سەردەمەكێ پڕی نەبوون و دەردەسەری، ب دەهسالان بارەكێ گران یێ جەرگسۆتی ل سەر شانێن خۆ هەگرت.
دایكێن بارزانی زارۆكێن خۆ ب دەستێن پڕی برین و ب دلەكێ بریندار مەزن كرین، لێ چ جاران پەشیمان نەبوون و چ جاران پشت نەدا ڕێبازا باب و باپیرێن خۆ و شۆڕشا ئیلۆنێ یا مەزن ب ڕێبەرییا بابێ ڕۆحی، مەلا مستەفا بارزانی. زارۆكێن وان مەزن بوون و بوونە پێشمەرگەیێن قەهرەمان، دا بێژنە داگیركەران كو خوینا بارزانییان هەردەم هەروە نابت و ئەڤ ئاخە بێخودان نینە. ئەنجام؛ دا مەشخەلەك بۆ ڕێیا پێشەڕۆژێ یە كو ئەنفالا بارزانییان بۆ مە تەنها بیرەوەریا خەمناك و ڕۆژەكا نەخۆش نینە، بەلكو مەشخەلەكا ڕۆهنە كو هەردەم د بیڕنە مە كو ئازادیا ئەم ئەڤرۆ تێدا دژین، ب بهایەكێ گران و ب خوینا پاكترین ڕەوشەنبیر و تێكۆشەرێن ڤی وەلاتی هاتییە بدەستخستن.
