یەلماز گۆنەی ژ هەلاویستنا پۆستەران بەرەڤ سینەمایێ
دلۆڤان هالۆ
سینەماکارێ ناڤدارێ کورد یلماز گۆنەی ل سالا 1937ێ ل گۆندێ یەنیجە یێ سەر ب پارێزگەها ئەدەنە ڤە ژ دایك بوویە، د بنیات دا کوردە و ئێك بوو ژ دوو زاڕۆکێن خێزانەکا کورد یا هەژار، دایك و بابێن وی نە خواندەڤان بوون، لێ وی حەزەکا مەزن بۆ خواندنێ هەبوو، لەوڕا ڕۆژانە ب دووراتیا ٦ کیلۆمەتران دچوو قوتابخانا گۆندی، ل پۆلا چارێ سەرەتایی دەیك و بابێن وی ژێك جودابوون، و لگەل دەیکا خوە بەرەڤ باژێڕی ئەدەنە چوون.
یلماز گۆنەی ژ لایەکێ ڤە ل سەر خواندنا خوە یێ بەردەوام بوو، و ژ لایەکێ دی ڤە ژی چەندین کار دکرن وەکو چنینا پەمبی و فرۆتنا سمیتان، ڕۆژەکێ ژ لایێ جیرانەکێ خوەڤە گۆهـ لێ بوو کو ل سینەمایەکێ پێدڤی ب کارمەندەکێ هەیە، لەوما پێشکێشی وی کاری کر و دەست بکاربوو وەکو کارمەندێ هەلاویستنا پۆستەرێن فلمێن نوو، ئەڤ کارە بۆ ئەگەر کو یلماز بەرەڤ سینەمایێ ڤە بچیت.
ل دەمێ کو یلماز قوتابیێ قوناغا ئامادەیی گۆڤارەك بناڤێ دۆرۆك بەلاڤکر و دەست ب نڤیسینا چیڕۆکان کر، ژبەر ئێك ژ چیڕۆکێن وی ل سالا 1955 ڤەکۆلین لگەل هاتە کرن، ل سالا1957ێ ژبەر خەون و هیڤیا وی یا بیاڤێ سینەمایێ بەرەڤ باژێڕێ ئیستەنبۆلێ ڤه چوو، یلماز گۆنەی ب تۆمەتا پڕۆپاگەندەیا کۆمۆنیزمێ سزایێ سالەك و نیڤان یێ زیندانیکرنێ ل سەر هاتە سەپاندن، پشتی کو ژ زیندانێ دەرکەفتی هاتە دوورئێخستن بۆ باژێڕێ کۆنیا.
ل سالا1968ێ بەرەڤ سەربازیێ ڤە چوو و پشتی دوو سالان زڤڕی، جارەکا دی ل سالا ١٩٧٢ێ ب تۆمەتا هاریکاریکرنا شۆڕەشگێڕان هاتە دەستگیرکرن و سزایێ ١٠ سالێن زیندانیکرنێ ل سەر هاتە سەپاندن، لێ پشتی دوو سالان و ل سالا ١٩٧٤ێ ب لێبورینا گشتی هاتە ئازاد کرن.
پشتی ئازاد بوونا وی ژ زیندانێ دەست ب دروستکرنا ئێکەم فلمێ خوە یێ بناڤێ (ئۆمێد) کر، ب دروستکرنا ڤی فلمی ژیانا یلماز گۆنەی هاتە گۆهوڕین، پاشان ژیانا هەڤژینییێ لگەل فاتۆش سۆلەیمان پێکئینا کو ل دەمێ سەربازیێ نیاسی بوو.
یلماز گۆنەی ل سالا ١٩٨٣ێ دووماهیك فلمێ خوە یێ بناڤێ دیوار بەرهەمئینا، زێدەباری وێ چەندێ کو یلمازی گەلەك پڕۆژەیێن هونەری هەبوون و حەز دکر ئەنجام بدەت، لێ نەخوەشیا شێرپەنجێ ل زیندانێ نەهێلا وان پڕۆژەیان بەرهەم بینیت، لەوڕا یلماز گۆنەی ل سالا ١٩٨٤ێ ژ ئەگەرێ نەخوەشیا شێرپەنجێ وەغەرا دووماهیێ کر.
یلماز گۆنەی 26 فلم بەرهەم ئیناینە کو دەرهێنان و سیناریۆیا ڤان فلمان ژ لایێ وی ڤە هاتبوو دانان، و وەکو ئەکتەر پشکداری د 110 فلمان دا کریە، زێدەباری نڤیسینا چیڕۆك و ڕۆمانان.
