دێ هژمارهكا کلیپێن نوو بەلاڤ کەم
رهمهزان زهكهریا:
سترانبێژ حهمید ئۆسمان ددیدارهكێ دا بۆ رۆژناما ئهڤرۆ گۆت: كاردكهم د نێزیكترین دهم دا كار ل سهر دوو ئاوازێن هونهرمهند زیاد ئهسعهد بكهم، دگهل بهلاڤكرنا ئهلبوومهكا هەشت تراكی یا هونهرمهندێ كۆچكری حهمه جهزا.
ناڤهاتی گۆت ژی: زیاد ئهسعهد ئێكه ژ وان هونهرمهندێن جوان یێن سالێن درێژ خزمهتا هونهری كوردی كری، ههموو ئاواز و سترانێن وی جهێ وان یێ تایبهته د ناڤ بوارێ هونهری دا، ئهو دو ئاوازێن دێ كاری ل سهر كهم ب ڕێكا عهبدولغهفارعهبدولا گههشتینه دهستێ من، دێ ب زووترین دهم كلیپان بۆ چێكهم و بهلاڤ كهم هیڤیدارم ب دلێ ههموو لایهكی بن.
ناڤهاتی گۆت: كاردكهم ب زووترین دهم ئهلبوومهكا هونهرمهندێ كۆچكری حهمه جهزا بهلاڤ بكهم كو ژ ههشت تراكان پێكدهێت چار ستران و چار مقام، كارێن مۆزیكێ ب رهنگهكێ گهلهك جوان و وهك خۆ هاتینه ئهنجامدان، بهلێ مخابن ژ بهر کاودانێن دهڤهرێ و رۆژههلاتا ناڤهڕاست، نهشیام د دهمێ خوە دا بهلاڤ بكهم و كار ب نیڤهرۆیی راوهستیاینه، ل دهرفهتهكا باش و دوور ژ شهڕ و ئالۆزیان دێ ئهلبوومێ ئێخمه بهر دهستێ حەز ژێكهرێن خوە.
حهمید ئاشكراكر: د شهڤه ئاههنگان دا ههموو جۆره سترانا دبێژین، ژ بهر كو ئارمانجا مه دلخوەشكرنا خهلكی یه، خهلكێ بهرههڤبوویی پێدڤی ب خۆشترین سترانایه پێشكێشی بكهین، سترانێن حهمه جهزا ژی ژ وان سترانانن یێن زارۆك و گهنج و پیر حهز ژێ دكهن، ب خوە بزاڤ كریه سترانێن كهڤن ژی نوو بكهمهڤه دا كو بەرەبابێ نووی یێ دهێته ئاههنگێن مه ئاشنای وان بن، لهورا داخوازا سترانێن ههموو هونهرمهندێن كهڤن ل مه دهێته كرن وهك حهمه جهزا و زیاد ئهسعهد و زهكهریا عهبدوللا، ئهژدهر وههبی، كهمال محهمهد، پهیوهند جاف و چهندین هونهرمهندێن دی.
