فلمەکێ نوو یێ ئەنیمەیشن ب کوردی هاتیە بەرهەمئینان
زاخۆ، دلۆڤان هالۆ:
فلمەکێ نوو یێ ئەنیمەیشن ب زمانێ کوردی بناڤێ (ئاوازا سرۆشتی)، ژ نڤیسین و سیناریۆیا پشتیوان عەبدوللا هاتیە بەرهەمئینان، کو دهێتە چاڤەڕێکرن ئەف فلمە ل ڤیستەڤالا کوردستان یا فلمێن ژینگەهێ بهێتە نیشاندان.
ئەڤ فلمێ ئەنیمەیشن هەلگرا پەیامەکا مرۆڤایەتی و ژینگەهێ یە، ب شێوەیەکێ هونەری گرنگی و پاراستنا سرۆشت و گیاننەوەران بەرچاڤ دکەت، و ب شێوەیەکێ هونەری پەیامەکا گەردوونی بۆ بینەرێ نافخوە و ژ دەرڤەی وەلاتی دگەهینیت.
ئەڤ فلمە نە بتنێ بەرهەمەکێ ئەنیمەیشن یێ سادەیە، بەلکو نامەیەکا مرۆڤایەتی و ژینگەهێ یە کو ب زمانێ وێنە و هەستان گرنگیا پاراستنا سرۆشت و گیاننەوەران دگەهینیت، هەرچەندە فلم ب زمانێ کوردی هاتیە بەرهەمئینان، لێ ب شێوەیەکێ هونەری و گەردوونی هاتیە دروستکرن کو پەیاما وێ بۆ بینەرێن هەموو جهێن جیهانێ بیت.
چیرۆکا فلمی ژ سپێدەهیەکا ئارام دەست پێدکەت ل دەمێ کو گەنجەك ب ناڤێ ئازاد دناڤ دارستانەکا جوان دا پیاسەیان دکەت و دارلاستیکەك لگەل خوە هەلگرتیە، بێدەنگیا سرۆشتی ب ئاوازا خوەش یا بلبلەکێ دشکێت و ئەو دەنگە ئازادی بۆ ناڤ کووراتیا دارستانێ ڕادکێشیت، داکو ل بن دارەکا مەزن وی بالندەیی ببینیت کو ب ئارامی ئاوازان د خوینیت.
ل دەستپێکێ ئازادی دڤێت وێ دارلاستیکێ بکاربینیت و وی بالندەیێ ئاواز خوەش بکەتە ئارمانج، لێ ئاوازا وی بالندەیی و ئارامیا سرۆشتی هێدی هێدی هزر و بیرێن ئازادی د گۆهوڕیت و هێزا دەستی نامینیت و دارلاستیك ژ دەستێ وی دکەڤیتە سەر ئەردی، ئانکو ئەو کەسێ ژ ئارمانجا ئازاردانا بالندەیی دهێته گۆهوڕین و بتنێ گۆهێ خوە ددەتە جوانیا سرۆشتی و لگەل ئارام دبیت، و ل دووماهیا فلمی ئەو بلبلە هەست ب ئارامی و پاراستنێ دکەت و بێ ترس نێزیکی ئازادی دبیت، ئاوازا خوەش یا وی بلبلی دارستانێ پڕی دەنگ دکەت، و بۆ بینەری پەیامەکا کوور بجهـ دهێلیت.
ئەڤ فلمە ب شێوەیەکێ سادە و کاریگەر، هزرا هەڤبەشا مرۆڤی و سرۆشتی دیاردکەت و نیشان ددەت کو گۆهۆڕینا ڕەفتارا کەسەکێ دشیاندایە دەستپێکا پاراستنا ژینگەهێ بیت، ئەڤ فلمە هیڤیەکێ دروست دکەت کو هونەر بشێت هەستێ بەرپرسیارەتیێ بەرامبەر سرۆشتی د دلێ بینەران دا زیندی بکەت، و ل هزرا وان بینیت کو جوانیا راستەقینە ئەوە کو مەندەهۆشێ سرۆشتی بین و ب پارێزین نەکو ئازار بدەین.
