جۆتیار عەلی: د چركێن دووماهیێ دا دادڤانان ئەم ژ سەركەڤتنێ بێ بەهركرین
قەیس وەیس:
د داخویانیەكێ دا ڕاهێنەرێ تیما یانەیا زاخۆ ژ دەستدانا سەركەڤتنێ د خولەكێن دووماهیێ دا ب ئەگەرێ شاشیێن چەند دادڤانان دا زانین و نە ڤەشارت كو د هندەك دەمان ژ دا یاریزان د باش نەبوو و سۆز دا پشتەڤانان ئەو قەرەبوویێ بكەن.
ئەڤچەندە هات پشتی د ئێكەم یارییا خوە یا زنجیرا پێنچ یاریێن فینالا خولا ئیراقێ دا بەرانبەر یانەیا دیفاع ئەلجەوی قارەمانا وەرزێ بۆری تووشی خوسارەتیێ بووی ب 70 خالان بەرانبەر 73ێ خالان، د یارییا واندا ئەوا ل هۆلا یانەیا ئەرمەن ل پایتەختێ ئیراقێ بەغدا هاتیە كرن.
زێدەتر ناڤهاتی بۆ ئەڤرۆ گۆت: یارییەكا ب هێز هاتبوو كرن بەرانبەر یانەیا دیفاع ئەلجەوی هەلگرا ناسناڤێ وەرزێ بۆری و خودان یاریزانێن پیشەكار و زیرەك، هەرچەندە د هەردو نیڤێن ئێكێ و دویێ دا مە كۆنترلەكا باش ل سەر یاریێ و ئەنجامی هەبوو و پێشكەڤتی بووین، د نیڤا دویێ یا چارێن سێیێ و چارێ دا یاریزانێن مە بەردەوامی دا ئاست و ئەنجامان هەتا خولەكا دووماهیێ ژی نێزیكی 10 خالان ئەم پێشكەڤتی بووین، سەرباری د هندەك دەمان دا یاریزانێن مە شاشیێن كەسۆكی هەبوون، لێ د چركەیێن دووماهییا یاریێ دا دادڤانان ئەم بێ بەهركرن ژ سەركەڤتنێ ب شاشیێن بەرچاڤ، مە داخواز دیتنا دوبارە یا شاشیان ب ڕییا ڤیدیۆیێ دكر لێ ئەوان ڕەدكر.
ژلایەكێ دووڤە جوتیاری سۆز دا پشتەڤانێن یانەیێ و گۆت: ژبەركو سیستەمێ فینالێ پێنج یاری نە و هێشتا مە هیڤیێن ماین و ڕژدین، لەوما ژی یارییا بهێت ئەو دێ سوبەهی دناڤ ئەرد و جەماوەرێ مە دا بیت هیڤییا مە ئەوە هۆلا پر بیت ژ پشتەڤانان و سۆزێ ددەین ب ئاستەكێ مەزن سەركەڤتنێ بینن، هاتنا جەماوەری دێ بیتە یاریزانێ شەشێ دناڤ یاریگەهێ دا، دڤێت ئەم سەركەڤتنێ بینن دا هیڤیێن ناسناڤی د گەشبن.
بۆ زانین یارییا دویێ بڕیارە سوبەهی چارشەمبی ل هۆلا یانەیا زاخۆ، دەمژمێر حەفتی شەڤ بهێتە كرن، یارییا سێیێ ل 16-8- 2026، هۆلا یانەیا ئەرمەن ل بەغدا دەمژمێر حەفتی شەڤ، یارییا چارێ زاخۆ دێ دیفاع ئەلجەوی ل 20ێ ڤێ مەهێ دەمژمێر حەفتی شەڤ مێڤان كەت، یارییا پێنجێ دێ ل 26ێ ڤێ مەهێ بیت ل هۆلا گرتییا یانەیا جەیش ل بەغدا دەمژمێر حەفتی شەڤ هێتە كرن.
