بۆچی نەزۆکیا زەلامان زێدەدبیت؟
بەرپەڕێ ساخلەمیێ:
نەزۆکی و گیرووبوونا زارۆکبوونێ ل سەرانسەری جیهانێ و دەڤەرا مە بەرەڤ زێدەبوونێ دچیت و ئەگەر چنە؟
د. نشوان محەمەد رەشید، تایبەتمەندێ نشتەرگەریێن گۆلچیسکا و میزەرۆیێ دیار دکەت کو نەزۆکی بابەتەکێ گەلەک بەربەلاڤە و سال بۆ سالێ ل سەرانسەری جیهانێ بەرەڤ زێدەبوونێ دچیت و ئاشکرا دکەت کو ئەگەر هەڤژینەک ماوێ سالەکێ پەیوەندیا هەڤژینیێ یا ئاسایی بێی بکارئینانا هیچ ڕێکارەکا ڕێگریێ هەبیت و زارۆک چێنەبن ل وێرێ ئەگەرێ هەبوونا نەزۆکیێ تێبینی دهێتەکرن و ل دووڤ ئاماران زێدەتر ژ چل ژ سەدێ ژ ئەگەران ژ لایێ زەلامی ڤەنە و چل ژ سەدێ ژ لایێ ژنێ ڤەنە و بیست ژ سەدێ ژ حالەتان ژی ئەگەرەکێ هەڤبەش د ناڤبەرا هەردو لایان دا هەیە.
سەبارەت گاڤا یەکەم بۆ ئەو کەسانێن زارۆکێن وان گیرۆ دبن ناڤبری روون دکەت کو بەری سالەک تەمام ببیت فەر نینە ڕاستەوخۆ قەستا نۆشداران بکەن چونکی دروستبوونا زارۆکی پێدڤی ب دەمی هەیە بەلێ هەکە سالەک دەرباز بوو باشترە دەستپێکێ پشکنینا ئاڤا زەلامی بهێتەکرن چونکی ئەڤ پشکنینە یا سادەیە و تێچوویەکا کێم هەیە و زانیاریێن گەلەک گرنگ ل سەر ژمارە و لڤین و شێوازێ سپێرمان ددەت و هەکە ئەنجامێ وێ باش بوو وی دەمی پشکنین بۆ ژنێ ژی دهێنەکرن.
ل سەر ئەگەرێن زێدەبوونا نەزۆکیێ د ناڤ زەلامان دا سال بۆ سالێ، تایبەتمەندێ نشتەرگەریێن گۆلچیسک و میزەرۆیێ ددیدارا خۆ دا بەحس ل وێ یەکێ دکەت کو تێکچوونا کوالیتیا خوارنێ و زێدەبوونا مادەیێن کیمیاوی و هۆرمۆنان د خوارنێن بلەز دا دگەل کێشانا جگارە و نێرگیلان کارتێکرنەکا ڕاستەوخۆ و نەرێنی ل سەر بەرهەمئینانا سپێرمان دکەن زێدەباری وێ کو قەلەوی و کێشا زێدە هۆرمۆنان تێکددەت و کوالیتیا ئاڤا زەلامی کێم دکەت.
ل دووماهیێ دکتور نشوان محەمەد رەشید ب مەبەستا پاراستنا ساخلەمیا زەلامان ڕێنما ددەت کو کێشا خۆ بپارێزن و خۆ ژ جلکێن تەنگ و گەرمیاتیا زێدە دوور بێخن و لاپتۆپێ ب شێوەیەکێ ڕاستەوخۆ سەر ڕانێن خۆ نەدانن و ژ بکارئینانا حەمامێن گەلەک گەرم و کێشانا تووتنێ دوور بکەڤن دا کو تووشی ئاریشێن نەزۆکیێ نەبن.
