تارق سەعید: ژبەر قەیرانا دارایی قارەمانی هاتیە پاشئێخستن و یاریزان بێ زاركرینە
د داخویانیەكێ دا تارق سەعید ڕاهێنەرێ تیما پایسكلڤانێن یانەیا دهۆك دیار كر ژبەر كاودانێن نوكە دەڤەر تێدا دەرباز دكەت و قەیرانا دارایی فدراسیۆنا ڤێ یاریێ ژڤانێ وەرزێ ئەڤ سالە یێ قارەمانیێ ل سەر هەموو ئاستان پاشئێخستیە و ئەڤچەندە ژی كارتیكرنا نەرێنی ل سەر یاریزانان كرییە و بێ زاركرینە.
زێدەتر ناڤهاتی گۆت: ب مخابنیڤە هەتا ئەڤرۆ ژی هیچ بڕیارەكا فەرمی ل سەر دەستپێكرنا وەرزێ نوو یا قارەمانیێن ئاستێن جودا یا ئیراقێ نە هاتیە دان، ل دەستپێكا كانوونا دویێ یا ئەڤ سالە بەرنامەیێ چار قووناغا یێن قارەمانییا ئیراقێ هاتبوو دانان كو دناڤبەرا چەند هەیڤان قووناغەك دێ ل باژێرەكی هێتە كرن ژ وانا باژێرێ دهۆكێ بوو، بڕیار ئەبوو ل ئادارا بوری هاتبا كرن، لی ژبەر كاودانێن شەڕی یێن دەڤەرێ هاتە پاشئێخستن، دووڤدا كاودان ئارام بوون فدراسیۆنێ دەست ب كاركر بۆ دانانا قارەمانیێ لێ ژبەر قەیرانا دارایی قارەمانی هاتە پاشئێخستن و هەتا ئەڤرۆ ژی چو بڕیارێن فەرمی نینن.
هەروەسان تارق سەعید گۆت: ئەڤە مەها تەباخێ ژی ب نیڤی بوو بێ هەبوونا هیچ قارەمانییەكێ، ل هەر سال هەتا ڤێ مەهێ ژ سەرجەمێ چار قووناغان دگەهشتینە قووناغا سێیێ، یا نەخۆشتر ژی فدراسیۆنا پایسكلڤانێن ئیراقێ دیاركریە هەلبژارتیێن ئیراقێ نەشێت پشكداریێ د قارەمانییا عەرەبی دا كەت ئەوا نیزیكی شەش یاریزانێن مە بۆ ژیێ،ن جودا دناڤدانە، ئەڤە هەبوو وەكرییە یاریزانێن مە بێ زاربن و ئێدی ئەو مۆرالا بلند یا بەرهەڤیان نە مینیت.
بۆ زانین یانەیا دهۆك ل سەر ئاستێ لاوان و تازەپێگەهشتییان دو تیمێن ب هێز و هەڤڕك هەنە و چار یاریزانێن وان ل گەل هەلبژارتیێ ئیراقێ پشكدارن، زێدەباری دو یاریزانێن دی یێن خەلكێ دهۆكێ ل سەر ئاستێ پێشكەڤتیان پشكدارن.
