بزاڤێن دوورئێخستنا مێرخاس دۆسكی ژ هەلبژارتیێ ئیراقێ دهێتە كرن
ژێدەرێن رۆژنامەڤانی ل پایتەختێ ئیراقێ بەغدا دۆپاتی ل سەر هەبوونا بزاڤێن دوورئێخستنا ستێرێ كوردستانی و ڕەڤەندا كورد ل ئۆرۆپا مێرخاس غازی دۆسكی ژ هەلبژارتیێ ئیراقێ دهێتە كرن، ب بوهانا وێ یەكێ كو پشتی ب دووماهی هاتنا مۆندیالێ و پێشوازییا سەرۆكێ فدراسیۆنێ یونس مەحموود ل یاریزانان مێرخاس دۆسكی خوە ژ سەرۆكێ فدراسیۆنێ دووركر و پووتە پێ نەدا.
ژلایەكێ دووڤە سەلام شاكر شرۆڤەكار وەرزشی دگەل كۆمەكا كەسان و پشت گەرمی ب چەند ئەندامێن فدراسیۆنێ لڤینا نەڕازیبوونێ ژبۆ دوورئێخستنا مێرخاس دۆسكی كاراكرییە ب بوهانا وێ یەكێ ئەوی ئیهانا سەرۆكێ فدراسیۆنێ كرییە و یێ پالدایی بوو ژ لایێ سەرۆكێ پێشتر عەدنان درجالی و خواستینە ئەڤ یاریزانە بهێتە دوورئێخستن، لێ لێ كۆمەكا دی یا شرۆڤەكارێن وەرزشی ل بەغدا دژی ڤێ لڤینێ داخویانی داینە كو ئەوا هاتیە روودان دڤێت مەزن نەكەن و مێرخاسی هیچ پەیوەندی ب ناكۆكیێن عەدنان درجالی و یونس مەحموودی ڤە نینن، یاریزانەكێ وەفادارە بۆ هەلبژارتیێ ئیراقێ و جهێ باوەریێ یە.
