پشتەڤانێن زاخۆ كلیلا سەركەفتنێ بوون و كاروانەكێ درێژ د ڕێدایە
د پرێسكۆنفرانسێ رۆژنامەڤانی دا یێ فرەنسی لۆران بانێت ڕاهێنەرێ تیما فوتبۆلا یانەیا زاخۆ كەیفخوەشیا خوە ب ئێكەم سەركەڤتن دناڤا ئەرد و جەماوەرێ خوە دا دیاركر و هەبوونا جەماوەرەكێ ئێكجار مەزن ئەگەرێ ڤێ ئەنجامی دا زانین، ئەڤچەندە هات پشتی تیما زاخۆ شیایی ب گۆلەكێ بێ بەرانبەر سەركەفتنێ ل سەر مێڤانا خوە یانەیا غاز ئەلشیمال یا كەركووكی بینت.
زێدەتر ناڤهاتی گۆت: ل دەستپێكێ پیرۆزبیت ل حەزژێكەر و پشتەڤانێن یانەیێ ئەوێن بووینە كلیلكا سەركەفتنا ڤێ یاریێ د ئێكەم یارییا خوە یا دەستپێكرنا وەرزێ نوو، هەرچەندە سەقایێ یاریێ و یاریگەهـ تا ڕادەیەكی د گۆنجایی نەبوون، لێ هەبوونا پشتەڤانێن زاخۆ و بەردەوامییا وان د90 خولەكان دا بوو ئەگەر ببیتە كلیلكا سەركەفتنێ، سەرۆشییە یاریێن ئێكێ ب ئاست و هزر بۆ هەردو یانەیان د ڤەشارتینە و ب زەحمەتن، بۆ مە گرنگ ئەو بوو مە سێ خال ب دەستڤە ئینان و دلێ جەماوەرێ خوە خۆشكر ئەڤە ژی یا گرنگ بوو.
ژلایەكێ دووڤە لۆران بانێت گۆت: د دەمێ بەرهەڤیێن مە بۆ خولێ و كەمپا ڕاهێنانێ دا گیرۆبوونا چەند یاریزانێن نوو بۆ ناڤ ڕێزێن و گیرۆبوونا بەرهەڤییان د پلان و بەرنامەیێن مە دا كرن، تیما مە یا د ڕێكەكا دروست دا دچیت، كارگێرییا یانەیێ ب هەموو شێوەیەكی یا پشتەڤان و هاریكارە، دێ بۆ یاریێن بهێت باشتر خوە بەرهەڤ كەین و بەردەوامیێ ب دەینە سەركەفتنان ژ بۆ ئارمانجا هەڤڕكیێ ل سەر ڕیزێن پێشیێ، هەرچەندە هێشتا زوویە بێژین لێ هیڤی و ئارمانجێن مە د مەزنن.
هەژی گۆتنێ یە تیما یانەیا زاخۆ د یارییا خوە یا دویێ ژ خولا ستێرێن ئیراقێ دا دێ ل پێنجشەمبییا بهێت بیتە مێڤانا یانەیا مینا یا بەسرایی، ژلایێ خوەڤە ل شەمبییا بهێت دهۆك دێ مێڤاندارییا یانەیا تەلەبە یا بەغدایی كەت.
