یونس مەحموود: نە پێدانا چار ملیار دیناران بۆ یانەیێن كوردستانی سیاسیە
د داخویانیەكێ دا سەرۆكێ فدراسیۆنا فوتبۆلا ئیراقێ ئەگەرێن نە پێدانا چار ملیار دیناران وەكو پشتەڤانییا دارایی بۆ یانەیێن پشكدار د خولا ستێرێن ئیراقێ دا ژ وانا هەر چار یانەیێن دهۆك، زاخۆ، هەولێر و نەورۆز ب بابەتەكێ سیاسی ڤە گرێدایە.
زێدەتر ناڤهاتی گۆت: ل سەر داخوازا هەرچار یانەیێن كوردستانی من ل گەل جهێن پەیوەندیدار ئاخڤتییە ژبۆ چارەسەركرنا ب بابەتێ دانا چار ملیار دیناران بۆ هەر ئێك ژ یانەیێن دهۆك، زاخۆ، هەولێر و نەورۆز ئەوێن ل وەرزێ بۆری بێ بەهركرین، لایەنێ حوكمەتا ئیراقێ دیاركرییە كو ئەو نەشێن هیچ كۆژمەیەكێ پارەیی ئاراستەیی ئەوان یانەیان بكەن ژبەركو بابەت ل سەر بودجەیا سالانەیە و بابەت سیاسیە و دیاركرییە كو هەرێما كوردستانێ بودجەیا خوە هەیە سەدا هەڤتە و ئەو پارەیێ بۆ یانەیان هاتیە تەرخانكرن ژلایێ حوكمەتێ دناڤا ئەوێ بودجەیێ دایە.
هەروەسان ناڤهاتی گۆت: مە هیچ دەستهەلاتەك ل سەر ڤی بابەتی نینە و یا سیاسیە و ئەم نەشێن مایتكرنێ تێدابكەین ، ئەم پشتەڤانیا فدراسیۆنێن لەقا دكەین ل پارێزگەهێن، دهۆك، هەولێر و سلێمانی بۆ هەر پێنگاڤەكێ، لێ ئەم حەز دكەین پشتەڤانییا یانەیێن كوردستانی ژی هەبیت و ل دەف مە هیچ جوداهی دناڤبەرا یانەیێن د خولا ستێرێن ئیراقێ دا، هیڤییا من ئەوە ئەڤ ئاریشە ژی بهێتە چارەسەركرن، یانەیێن كوردستانی سەنگا خوە یا هەیی د خولێ دا.
بۆ زانین ئەڤە دێ بیتە چار وەرز ژ خولا ستێرێن ئیراقێ حوكمەتا ئیراق یا فدرال هیچ بۆدجەیەك یان هاریكاریەك بۆ یانەیێن كوردستانی نەكرییە د بەرانبەر دا پشتەڤانییا دارایی یا هەموو یانەیێن دی یێن ئیراقێ د خولێ دا كریە.
