یانەیا ئافرەتێن دهۆكێ دێ نوونەراتییا ئیراقێ و كوردستانێ كەت
د داخویانیەكێ دا سەرۆكێ فدراسیۆنا فوتبۆلا ئیراقێ یا شەش یاریزانی ب فەرمی یانەیا ئافرەتێن دهۆك هاتیە دەستنیشانكرن ژبۆ نوونەراتییا ئیراقێ د قارەمانییا جیهانێ دا، ئەوا دهێتە چاڤەڕێ كرن ئێك ژ پارێزگەهێن كوردستانی مێڤاندارییا وێ بكەت.
ئەڤ داخویانیە هات پشتی ل شۆباتا بۆری تیما شەش یاریزانی یا یانەیا ئافرەتێن دهۆكێ ناسناڤێ قارەمانییا ئیراقێ ب دەستڤە ئینایی ئەوا د یارییا دووماهیێ دا ب سەركەڤتی ل سەر یانەیا ئالبدێر ب لێدانێن پەنەلتییان 2-1 پشتی یاری بێ گۆل وەكهەڤی ب دووماهی هاتی، تێدا هەشت یانە پشكدار بوون.
زێدەتر حاتم عەبۆد گۆت: ژبەركو قارەمانا ئیراقێ یە ب فەرمی یانەیا ئافرەتێن دهۆكێ هاتییە دەستنیشان كرن بۆ قارەمانییا جیهانی، ئەوا بڕیارە د ئەڤ سالە دا هەڤڕكیێن وێ ل ئێك ژ باژێرێ كوردستانی بهێتە كرن و دوور نینە پارێزگەها دهۆكێ مێڤاندارییا وێ بكەت هەكە ئەم شیانین پشتەڤانییا دارایی و مەعنەوی وەربگرین، مە پرۆپۆزالێ خوە ئاراستەیی ڕێڤەبەرییا وەرزشی و پارێزگەرێ دهۆكێ كرییە بۆ هندێ ڕازیبوون ل سەر بهێتە كرن و دووڤدا دێ بۆ فدراسیۆنا جیهانی یا شەش یاریزانی هێتە هنارتن، هەكە ڕازیبوون هات دێ دەم و ژڤانێن قارەمانیێ هێنە دیاركرن و دێ د ئەڤ سالە دا بیت هەكە چو كاودانێن نە چاڤەڕێ كری پەیدا نەبن.
ژلایەكێ دووڤە ناڤهاتی ڕژدییا مێڤانداریكرنا پارێزگەها دهۆكێ بۆ قارەمانیێ گۆت: د ماوەیێ كێمتر سالەكێ دا مە سێ قارەمانی ل كوردستانێ داناینە، ئێك ژ وان ل سەر ئاستێ یانەیێن حیهانی ل هەولێرێ، یا دویێ قارەمانییا ئیراقێ ل پارێزگەها دهۆكێ و یا سێیێ قارەمانییا كۆمارا ئیراقێ ل باژێرێ سۆران پێنەڤێت ژبەر چەند ئەگەر و خالێن سەركەڤتنا پرۆسا قارەمانیێ بوو ئەو ژی ژبەر ژێرخانەیا وەرزشی وەكو هۆل، یاریگەهـ، ئۆتێلێن مۆدرێن، سەقایێ خوەش كو هەموو شاندێن پشكدار ئارامی و خوەشیێ ژێ بینن.
لدووماهیێ پەسنا پێشكەڤتنا وەرزشا كوردستانێ كر و گۆت: ئەو پێشكەڤتنا ئەم دبینن د بوارێ وەرزشێ دا نیشانێن پووتەدانا حوكمەتا هەرێمێ یە بۆ هەموو بوار و تەخان دا، ئەم سۆپاسییا ڕێزدار مەسرۆر بارزانی سەرۆكێ حوكمەتا هەرێمێ و پارێزگارێ دهۆكێ و یێ هەولێرێ و ڕێڤەبەرێ گشتی یێ وەرزشی ل كوردستانێ دكەین كو هەر ژ رۆژا ئێكێ یا دانانا قارەمانییا ل كوردستانێ پشتەڤان بووینە پێنەڤێت رۆلێ بەرپرسێن وەرزشی ل باژێری ژبیر نەكەین گەشبینیەك بۆ مە پەیداكرییە كو وەرزشا پارێزگەهێ یا پێشكەڤتییە.
