شڤان جەمیل: ئەنجامەكێ ژ هەژی نەبوو دڤێت یارییا بهێت قەرەبوو بكەین
قەیس وەیسر
بۆ یارییا دویێ ل دووڤ ئێك تیما یانەیا زاخۆ نەشیا دلێ جەماوەرێ خوە خۆشبكەت، پشتی بەرانبەر مێڤانا خوە یانەیا دیالا ب دو گۆلان وەكهەڤ بووی، د یارییا واندا ئەوا سێشەمبییا بۆری ژ چارچووڤەیێ گەڕا سێیێ یا خولا ستێرێن ئیراقێ هاتیە كرن، ئەڤە ئەنجامی توورەبوونەكا زێدە ژلایێ جەماوەری بەرانبەر ڕاهێنەر و چەند یاریزانان پەیدا كر.
یاریزانێن زاخۆ د ڕازینینن
د داخویانیەكا رۆژنامەڤانی دا شڤان جەمیل كاپتنێ تیما یانەیا زاخۆ گۆت: داخوازا لێبۆرینێ ژ پشتەڤانان دكەین كو ئەم نەشیان سەركەڤتنێ بینن و دلێ وان خوە بكەین، چەنس مە نەبوو ژبەركو كۆمەكا دەلیڤەیێن گۆلكرنێ مە ژ دەست دان و ئەنجامەكێ ژ هەژی نەبوو دڤێت یارییا بهێت قەرەبوو بكەین، ژبەركو شاشی هەبوون دڤێت بهێنە چارەسەركرن مە تیمەكا ب هێز یا هەی.
دەلیڤەیا دووماهیێ
ل دووڤ ژێدەرێن باوەرپێكری بۆ رۆژنامەیا ئەڤرۆ كو دبیت یارییا بهێت یا تیما زاخۆ بەرانبەر یانەیا زەورا ژ گەڕا سێیێ یا خولا ستێرێن ئیراقێ ببیتە دووماهی دەلیڤە بۆ ڕاهێنەرێ وێ یێ فرەنسی لۆراند بانێد هەكە ئەنجام نە هات دێ هێتە دوورئێخستن، ژلایەكێ دووڤە هاتیە پشتراستكرن كو نێزكترین ڕاهێنەر ل جهێ وی بگریت مەسعۆد میرالە و بەرهەڤبوونا وی ل یارییا بۆری و روونشتنەك دگەل كارگێریێ یە.
گۆلپارێزەك د ڕێ دایە
دناڤا سازیەكا ڕاگەهاندنێ دا هاتیە بەلاڤكرن و هاتیە پشتراست كرن كو كارگێرییا یانەیا زاخۆ دەرگەهێ دانوستاندنێ ل گەل گۆلپارێزێ یانەیا زەورا موجتەبی محەمەد ڤەكرییە ئەوێ گرێبەستا وی هەتا هاڤینا سالا 2028ێ یە، لێ یانەیا زەورا بەرهەڤبە بفرۆشیت و گۆلپارێز ژی حەزا چوونێ هەیە، دبیت یارییا بهێت ڕەهوشالێن ڤێ دانۆستاندنێ دیاربن و ئێكلابیت، ئەڤ پێنگاڤە هات دەرئەنجامێ نەڕازیبوونا پشتەڤانان و كارگێرییا یانەیێ ب ئاستێ گۆلپارێز عیماد عیسایی د هەرسێ یاریێن بۆری دا.
یارییا بهێت بەرانبەر كێیە؟
چاڤەڕێ دهێتە كرن ل شەمبییا بهێت تیما یانەیا زاخۆ ل پایتەختێ ئیراقێ بەغدا ببیتە مێڤانا یانەیا زەورا ئێك ژ گرنترین یاریێن ڤێ حەفتیێ و گۆپیتكا گەڕا چارێ یا خولا ستێرێن ئیراقێ یە، ژ یاریێن دی یێن شەمبییا بهێت، دیالا- جەولان، جەوییە- نەفت میسان، كەرخ- كارەبا.
