شانۆگەریەکا کوردی ل وەلاتێ تۆنس دو خەلاتێن گرنگ ب دەستڤەئینان
زاخۆ، دلۆڤان هالۆ:
نەژاد نەجم، دەرهێنەرێ شانووگەریا کوردی یا بناڤێ (ل پشت دەرگەهێن گرتی) د دیدارەکێ دا بۆ ڕۆژناما ئەڤرۆ دیارکر کو مە وەکو گرۆپێ شانوویا هاوار ب پێشکێشکرنا شانووگەریا (ل پشت دەرگەهێن گرتی) ل خۆلا 16ێ یا ڤیستەڤالا نێڤدەولەتی یا زانکۆیا مونەستیر ل وەلاتێ تونس شیا دوو خەلاتێن گرنگ ب دەستخوەڤە بینین، کو خەلاتێ ئێکێ یێ باشترین ئەکتەرا کچ بوو کو ب ئەکتەرا شانووگەریا مە هاوسەر ئدریس هاتە دان و خەلاتێ دووێ یێ باشترین ناڤەڕۆك و داهێنانا شانووگەریێ بوو کو ب من هاتە دان وەکو دەرهێنەرێ شانووگەریێ.
ناڤهاتی ئاماژە ب وێ چەندێ ژی کر کو ئەڤ شانووگەریە ژ نڤیسینا مەلاك ئەحمەد بوو، و ژ سیناریۆ و دەرهێنانا من بوو، و هاوسەر ئدریس و سەلام زەنگەنە و دارا عزەددین ئەکتەرێن ڤێ شانووگەریێ بوون.
گۆت ژی:»چیڕۆکا ڤێ شانۆگەریێ بەحسێ وێ چەندێ دکەت کا ل پشت دەرگەهێن گرتی چ دهێتە کرن، و بەحسێ بابەتێن هەستیار یێن سەردەمێ نوکە دکەت کو چەندین کارێن نە ژ هەژی و توندوتیژی توشی خەلکەکێ بێ تاوان دبیت، و بەحسێ وێ چەندێ دکەت کا جڤاك چ ب سەرێ مرۆڤێن باش و پاقژ دا دئینیت هەتا کو دبنە کەسێن توندوتیژ، هەر چەندە د بنیات دا هەموو مرۆڤ ب باشی و پاقژی ژ دایك دبن، لێ ژ نەچاری دبنە کەسێن توندوتیژ و نە ساخلەم د جڤاکی دا».
