ئەڤرۆ یارییا دهۆك و نەورۆز ب تاما كلاسیكۆیا كوردستانی یە
قەیس وەیس
چاڤەڕێ دهێتە كرن ئەڤرۆ و سوبەهی شەش یاریێن مایی ژ هەڤڕكیێن گەڕا چارێ ژ خولا ستێرێن ئیراقێ یا فوتبۆلێ بهێنە كرن، دهۆك و نەورۆز د دیربییەكێ تایبەت و كوردستانی دانە و یانەیێن هەولێر و غاز ئەلشیمال دێ بەرانبەر یانەیێن باشۆرێ ئیراقێ جەنگن و ئارمانجا هەموویان سەركەفتنە.
كلاسیكۆیا ب براینی ناڤ كریە
بڕیارە ئەڤرۆ ل دەمژمێر 4:45 ئێڤاری تیما یانەیا دهۆك ل باژێرێ سلێمانیێ ببیتە مێڤانا یانەیا نەورۆز د ئێك ژ یاریێن گرنگ و خۆش د خولێ دا كو دهێتە هژمارتن ئێك ژ یاریێن كلاسیكۆیا كوردستانی، ژبەر گرنگییا وێ بۆ پشتەڤانێن دو پارێزگەها دهۆك و سلێمانیێ، چاڤەڕێ دهێتە كرن كۆمەكا باش یا پشتەڤانێن دهۆكێ ژی ل یاریگەها نەورۆز بەرهەڤبن، ئەڤ یارییە هاتە ناڤكرن ب یارییا براینیێ، هەردو یانەیان د سۆشیالێن خوە یێن فەرمی دا ب یارییا براینی قەلەم دایە.
ئەنجامێن پێشتر د باش نینن
پشتی بۆرینا سێ گەڕان ژ یاریێن خولێ ئەنجامێن هەردو یانەیان دباش نینن و هەردو یانە دێ بزاڤێ كەن بۆ قەرەبوویا خالان كەن و ئێكەم سەركەڤتن د خولێ دا تۆماربكەن، یانەیا دهۆك ژ سێ یاریێن بۆری بەرانبەر ئەلغراف، تەلەبە و نەفت یا بەغدایی وەكهەڤی ئینایە، د بەرانبەر دا یانەیا نەورۆز وەكهەڤبوویە بەرانبەر جەوییە ب گۆلەكێ و تووشی خوسارەتیێ بوویە بەرانبەر ئەلغراف و تەلەبە.
ڕاهێنەرێ دهۆكێ چ پێشبینی دكەن
د پرێسكونفرانسێ ڕۆژنامەڤانی دا یەحیا گۆل محەمەد ڕاهێنەرێ تیما یانەیا دهۆك دیاركر بۆ یارییا ئەڤرۆ یاریزان داخوازكرینە باشترین ئاست نیشان بكەن و سێ خالێن یاریێ پێدڤینە ژبۆ ڤەگەڕاندنا تیمێ ل سەر هێلا سەركەفتنان و گۆت: پێنەڤێت یاری ب سانەهی نابیت، هەردەم یاریێن بڤی شێوەیی بووینە جهێ پووتەدانێ، یاری ب سانەهی نابیت بەرانبەر تیمەكا خودان یاریگەهـ، ڕژدین بگەهینە ئارمانجا خوە ئەوژی سەركەفتن بیت.
هەولێر و مینا شەڕێ سەرێ لیستێ یە
ژلایێ خوەڤە یانەیا هەولێر دێ یارییا خوە سوبەهی ل یاریگەها خوە مێڤاندارییا یانەیا مینا یا بەسرایی كەت ئەوا دێ ل دەمژمێر نەهی شەڤ هێتە كرن، هەولێرێ حەفت خال هەنە ل رێزا سێیێ دهێت ب كۆمكرنا حەفت خالان ژ دو سەركەفتن و وەكهەڤییەك د ناڤبەرا وێ و هەردو یانەیێن ئێكێ و دویێ بتنێ ڕێژەیا تۆماركرنا گۆلایە، دێ بزاڤێ كەت پێشڤەبچیتە سەرێ لیستێ، یانەیا مینا هەڤڕكا وێ یە ل ڕێزا دویێ دهێت ب هەمان خال پترییا گۆلان، ئەوا یانەیا مووسل پترتر گۆل هەنە ڕێزا ئێكێ دهێت.
غاز ئەلشیمال نوونەرا پێنجێ یا كوردستانی یە
ژلایەكێ دووڤە ئەڤرۆ ل دەمژمێر نەهی شەڤ یانەیا غاز ئەلشیمال یا كەركووكییا كوردستانی دێ ل یاریگەها ناسریە بیتە مێڤانا یانەیا ئەلغراف یارییەكا ب سانەهی نابیت بۆ نوونەرا كوردستانی ئەوا بتنێ دو خال هەین ژ دو وەكهەڤیان و خوسارەتیەك تۆماركرییە ل ڕێزا 15ێ دهێت، یانەیا ئەلغراف چار خال هەنە ڕێزا 12ێ دهێت.
ژ یاریێن دی یێن ئەڤرۆ د خولێ دا
ئەلگەرمە- كەربەلا، یاریگەها جەولان ل دەمژمێر 6:45 مەغرەب هێتە كرن.
شورتە- مووسل، یاریگەها شورتە، ل دەمژمێر نەهی شەڤ.
سوبەهی دوشەمبی یانەیا تەلەبە ل یاریگەها ئەلمەدینە مێڤاندارییا یانەیا نەفت ل دەمژمێر 6:45 مەغرەب كەت.
