فـاكتەرێن ئـاڤـاكرنـا كـوردستانـەكـا ب هێز
سەلاح بەیتولا ئاكرەیی
هەر نەتەوەیەكی خەونا وەلاتەكێ ب هێز و ئاڤەدان د دلێ خۆ دا هەلگرتیە، لێ خەون بتنێ ب دەستڤەنائێت، كوردستان ژی ژ بۆ كو ببیتە ولاتەكێ ب هێز و سەربەرز، پێدڤی ب چەند پەیایێن سەرەكی هەیە كو ئەم هەموو بەرپرسیارین ژ جێبەجێكرنا وان.
ئێك: ئێكڕیزی، مەزنترین هێز
دیرۆكێ ئەم فێركرینە، دەمێ ئەم ژ هەڤ جودا دبووین لاواز دبووین و دەمێ ئەم ئێكگرتی ژی بووین، ب هێز بووین.
ئاڤاكرنا كوردستانێ پێدڤی ب رەڤاندن و ژناڤبرنا دیوارێن جوداكرنا حزبی، ناڤچەگەری و تەنگەیا بیرە و پێدڤی یە نیشتیمان ژ هەموو بەرژەوەندیێن تایبەت پیرۆزتر بیت و كوردستان مالا تەڤ تاكەكێ كورد بیت.
دو: وەبەرهینان د مرۆڤی دا، وەبەرهینان د پاشەڕۆژێ دا.
بهێزترین وەلاتێن جیهانێ ئەوێن یێن كو زۆرترین زانكۆ و ڤەكۆلەر هەیین و پێدڤیە سیستەمێ پەروەردەیا مە نفشەكێ هوشیار دروست بكەت كو تنێ خۆدان باوەرنامە نەبن، بەلكۆ خۆدان هزر و داهێنان بن و زانكۆیێن مە ببەنە ناڤەندێن ڤەكۆلینێن زانستی و گەنجێن مە ببەنە ئەندازیار، نۆژدار و بەرنامەساز چونكو ولات ب مرۆڤێن خۆدان زانست بهێز دبیت.
سێیەم: ئابووریەكا جۆراوجۆر و پاقژ
پشتبەستن ب تنێ ب ژێدەرەكێ داهاتی مەترسیەكا مەزنە، لەوما پێدڤی یە ئەم ئابوورێ كوردستانێ جۆراوجۆر بكەین، چاند، پیشەسازی، گەشتوگوزار و تەكنەلۆژیا.
چار: سەروەریا قانوونێ و دادپەروەری
چ وەلات بێ قانوون ئاڤەدان نابن و دەمێ قانوون ل سەر هەمووان ب شێوەیەكێ ئێكسان هاتە جێبەجێكرن، باوەریا خەلكی بلند دبیت و خزمەتگوزاری وەك ئاڤ، كارەبا، ساخلەمی و ئاسایش پێدڤی یە ماف بن نەكو ئیمتیاز و هەبوونا حوكمەتەكا خۆدان شەفافیەت، باوەری بۆ گەلی پەیدا دكەت و دلسۆزیا گەلی زێدەتر لێ دكەت.
پێنج: پاراستنا ناسنامە و كەلەپوورێ
كوردستانەكا ب هێز ئەوە یا كو رەح و ریشالێن وێ د دیرۆكا وێ دا كویر بن.
پاراستنا زمانی كوردی، كەلەپوور، هونەر و نەریتێن مە بەرپرسیاریەتا نەتەوەییە و دڤێت ئەم مۆدێرن بین نەك كۆپییێن كەسێن دی بین.
دیماهیك:
كوردستانەكا ب هێز د پۆلێن قوتابخانەیان دا، د كارگەهێن پیشەسازی دا، د زەڤی و كێلگەیێن جۆتیاران دا و د هزرێن گەنجان دا دروست دبن. دەمێ هەر تاكەك بڕیارێ بدەت كو ئەز دێ دەست پێ كەم، وێ دەمی كوردستان دەست پێ دكەت. ب هێزبوونا وەلاتی ژ هێزبوونا تاكێن وێ دەست پێدكەت.
