ئەركێ یانەیێن پارێزگەهێ د خولا كوردستانێ دا ب زەحمەتە
بڕیارە ئەڤرۆ هەر پێنج یانەیێن پارێزگەهێ یاریێن خوە ژ گەڕا سێیێ یا هەڤڕكیێن خولا پلا دویێ یا كوردستانێ دەربازبوون بۆ خولا پلا ئێك ب یاریێن ئاگرین و دێربییان ئەنجامبدەت، ئەوا دێ هەموو یاری ل دەمژمێر 4:30 ئێڤاری هێنە كرن.
پیرس- شێلادزێ
ل یاریگەها خوە و دناڤ جەماوەرێ خوە دا یانەیا پیرس دێ یانەیا شێلادزێ مێڤان كەت، خودانێن ئەردی ئەوا ژ دو یاریێن بۆری تووشی خوسارەتیێ بوویە ل گەل باتیفا و بجێل ئەڤرۆ دەلیڤەیا زێرینە بۆ ڤەگەڕاندنا هیڤیێن خوە، لێ یانەی شێلادزێ ئەوا بهێز هاتیە دناڤ خولێ دا پاریەكێ ب سانەهی نابیت ئەو سەركەڤتن ل سەر هەریر ب حەفت گۆلێن پاقژ ئینایی و ل گەل باتیفا وەكهەڤبووی.
بجێل- هەریر
د دیدارەكا دی دا یانەیا بجێل دێ ل یاریگەها خوە هەریر مێڤان كەت و چاڤ ل سەركەڤتنا سێیێ یە، پشتی د هەردو یاریێن بۆری دا بەرانبەر دینارتە 4-چنە و پیرس 2-چنە سەركەڤتنێن گرنگ ئیناین، ژلایێ خوەڤە هەریر د هەردو یاریێن خودا تووشی خوسارەتیێ بوویە، هیڤیێن بجێلێ بهێزن بۆ پلێتەكا دەربازبوونێ.
دینارتە- باتیفا
دیدارا سێیێ یا نوونەرێن پارێزگەهێ یە دینارتە دێ ل یاریگەها خوە باتیفا مێڤان كەت ئەوا خوسارەتبووی بەرانبەر بجێل و سەركەڤتی ل سەر هەریر، ژلایێ خوەڤە باتیفا ژی ب ئارمانجێن مەزن دێ هێتە دناڤ یاریێ دا خودا سەركەڤتنێ ل سەر پیرس و وەكهەڤی بەرانبەر شێلادزێ.
