هەولێرێ سەرێ لیستێ گرت و دهۆك د ناڤ سیناریۆیێن وەكهەڤیان دا بەردەوامە
قەیس وەیس
پشتی بۆرینا چار گەڕان ژ هەڤڕكیێن خولا ستێرێن ئیراقێ یا فوتبۆلێ ئاگرێ هەڤڕكییان هێدی یا بۆشتر لێدهێت و یانەیێن شەڕی بۆ سێ خالان دكەن، ب دووماهی هاتنا یاریێن حەفتییا چارێ یانەیێن كوردستانی دناڤبەرا ڕێزبەندیێن جودا و ئەنجامێن نە چێگیر دا، رۆژنامەیا ئەڤرۆ دێ ب ئامار ئەنجام و ڕێزبەندییا بۆ هەوە دیاركەت
ئێشا وەكهەڤییا گرتییە
ئەلهۆیێن چیا دەستپێكەكا ب ئاستەنگ و زەحمەت هاتیە دناڤ خولێ دا ژبەركو ئەنجامێن وەكهەڤی ل سەر تیما فوتبۆلا یانەیا دهۆكێ زالبوویە سەرباری د گەلەك یارییان دا ئاستەكێ باش نیشان دایە، د دو یاریێن دەستپێكی دا بەرانبەر ئەلغراف 1-1 و تەلەبە 3-3 د ناڤ ئەردێ خوە دا وەكهەڤی ئینابوو، دووڤد دو یاریێن دەرڤەیی یاریگەها خوە دا ژی وەكهەڤی ئینا، ل بەغدا بەرانبەر نەفت 1-1 و ل سلێمانیێ بەرانبەر نەورۆز بێ گۆل وەكهەڤبوو، ئانكو سەرجەمێ 12 خالان بتنێ چار خال كۆمكرینە، پێنچ گۆل تۆماركرینە و پێنچ گۆل ژی ل سەر هاتینە تۆماركرن، د ڕێزبەندییا نوكە دا ل رێزا 15ێ دهێت، یارییا بهێت دێ سوبەهی پێنجشەمبیێ ل یاریگەها خوە مێڤاندارییا یانەیا جەوییە یا بەغدایی كەت د یارییەكا بهێز دا.
ئاستێ زاخۆ جیگیر نینە
ژلایێ خوەڤە ژی ئاست و ئەنجامێن تیما یانەیا زاخۆ كوڕێن خابووری د جیگیر نینن و ئەو پێشبینی و هیڤی و ئۆمێدێن پشتەڤانێن وان بەری دەستپێكرنا خولێ هەبووین لاواز كرینە، ژ چار یاریێن بۆری سەركەڤتنەك بەرانبەر غاز ئەلشیمال ب گۆلەكا پاقژ و خوسارەت بوو بەرانبەر مینا ب2-1 گۆلان یارییا سێیێ وەكهەڤ بوو بەرانبەر دیالا 2-2، بۆ یارییا چارێ مەزنترین خوسارەتی دا بەرانبەر یانەیا زەورا ب چار گۆلێن پاقژ، ئانكو سەرجەمێ 12 خالان بتنێ چار خال كۆمكرن ل ڕێزا 13ێ ڕاوەستیا، چار گۆل یێن هەین و هەشت گۆل لسەر هاتینە تۆماركرن، یارییا بهێت یانەیا زاخۆ دێ ل شەمبییا بهێت مێڤاندارییا یانەیا تەلەبە یا بەغدایی كەت.
ئەرێ گوهۆڕینا ڕاهێنەری چارەسەرییە؟
پشتی ئەنجامێن نەجیگر و ئاستێ لاوان و بۆرینا چار گەڕان یانەیا زاخۆ نەچاربوو ڕاهێنەرێ خوە یێ فرەنسی لۆراند بانێت دووربێخیت و ل جهێ وی ڕاهێنەرێ قەتەری تەلال ئەلبلۆشی ڤەگەڕینتە زاخۆ ئەوێ هەر ل وەرزێ 2023ێ هەتا نیسانا 2025ێ ڕاهێنەرێ زاخۆ بوو، پێكهایێ كوڕێن خابووری ب كۆمەكا یاریزانێن پیشەكار و خودان شیان هەنە و گرێبەستێن وان ل سەر ملیار دیناران دا هاتینە ئیمزاكرن، پسیار ئەوە ئەرێ دێ تەلال ئەلبلۆشی شێت یانەیا زاخۆ ڕزگاركەت و هیڤی و ئۆمێدێن جەماوەرێ وێ گەشكەت و ب جهئینیت.
هەولێر وەكو نەخشێ وەرزێ بووری دچیت
تیما یانەیا هەولێر بەردەوامە ل سەر ئەنجامێن خوە یێن باش پشتی شیایی د چار یاریێن بۆری دا سێ سەركەڤتنان بینت بەرانبەر یانەیێن كارەبا، كەرخ و مینا و ئێك وەكهەڤی بەرانبەر یانەیا جەوییە بنیت و پێشڤە هاتیە سەرێ لیستێ ب كۆمكرنا 10 خالان وەكو ل دەستپێكا وەررزێ بۆری هەرزوو سەرێ لیستێ داگیركر، یارییا بهێت یا هەولێرییان ب سانەهی نینە بەرانبەر هەلگرا ناسناڤی یانەی شورتە ل ئەینیا بهێت پایتەختێ ئیراقێ بەغدا كەت.
نەورۆزێ مفا ژ سكالایا خوە وەرگرت
هەرچەندە پشتی بۆرینا چار گەڕان ئەنجامێن نەورۆز ژی د جیگیر نینن ئەوا دو خوسارەتی هەیین بەرانبەر ئەلغراف و تەلەبە و وەكهەڤی بەرانبەر جەوییە و دهۆك، لێ شیا سێ خالێن تەلەبە بخوە ڤەگەرینیت دەرئەنجامێ سكالایا پشكدارییا دو یاریزانان ب ئێك هژمارەیا درێسی، یانەیا تەلەبە تانە ل بڕیارێ دایە و ئەڤرۆ دێ ئێكلا بیت، یارییا بهێت یا نەورۆز دێ رۆژا ئەینی بەرانبەر نەفت میسان بیت.
دەستپێكەكا ناڤنجی بۆ غاز ئەلشیمال
تیما یانەیا غاز ئەلشیمال یا كەركووكی كو دبیتە نوونەرا پێنجی یا كوردستانیان ب ئاست و ئەنجامێن ناڤجی چار گەرێن بۆری دەرباز كرینە، ئێكەم خوسارەتی بەرانبەر زاخۆ بوو، دووڤدا دو وەكهەڤیێن ل دووڤئێك بەرانبەر كارەبا و جەوییە بوون، یارییا چارێ شیا سەركەڤتنێ ل سەر ئەلغراف بینیت، د نوكە دا پێنج خال هەنە ل ڕێزا 11ێ دهێت، یارییا بهێت دێ ل ئەینیا بهێت یانەیا جەولان مێڤان كەت.
ئەنجامێن یاریێن دی یێن گەڕا چارێ جەوییە1-1 نەفت میسان، دیالا 3-3 جەولان، شورتە 2-چنە مووسل، كەرخ-2-2 كارەبا، تەلەبە چنە-چنە نەفت، ئەلگەرمە 2-چنە كەربەلا.
یاریێن گەڕا پێنجێ بڤی شێوەیی نە
پێنچ شەمبی 3-9- 2026
دیالا- ئەلگەرمە، یار
یگەها دیالا، دەمژمێر 6:45 بەری مەغرەب.
مووسل- زەورا، یاریگەها هەولێر، دەمژمێر 6:45 بەری مەغرەب.
دهۆك جەوییە، یاریگەها دهۆكێ، دەمژمێر نەهی شەڤ.
كارەبا- ئەلغراف، یاریگەها زەورا، دەمژمێر نەهی شەڤ.
یاریێن رۆژا ئەینی 4-9-2026.
غاز ئەلشیمال- جەولان، یاریگەها نەورۆز، دەمژمێر 6:45 بەری مەغرەب.
كەربەلا- كەرخ، یاریگەها كەربەلا، دەمژمێر 6:45 بەری مەغرەب.
شورتە- هەولێر، یاریگەها شورتە، دەمژمێر نەهی شەڤ.
نەفت میسان- نەورۆز، یاریگەها میسان، دەمژمێر نەهی شەڤ.
یاریێن رۆژا شەمبی 5-9-2026
زاخۆ- تەلەبە، یاریگەها زاخۆ، دەمژمێر 6:45 بەری مەغەرب.
مینا- نەفت، یاریگەها ئەلفەیحا، دەمژمێر نەهی شەڤ.
